माओवादी केन्द्र संसदीय दलको बैठक बस्दै

काठमाडौं । नेकपा (माओवादी केन्द्र) संसदीय दलको बैठक बुधबार बस्दै छ । बैठक दलकै कार्यालयमा दिउँसो २ बजे बस्न लागेको हो ।

बैठकमा पछिल्लो विकसित राजनीतिक घटनाक्रम, विश्वासको मत लगायतका विषयमा छलफल हुने जनाइएको छ ।

नेपाली कांग्रेस र नेकपा (एमाले) ले नयाँ गठबन्धनमा सरकार गठनको तयारी गरिरहेका छन् । माओवादी केन्द्रले समग्र राजनीतिक परिस्थितिको जानकारी सांसदहरुलाई गराउन पनि दलको बैठक बोलाइएको जनाएको छ ।

एमालेले माओवादी केन्द्रसँगको सत्ता साझेदारी तोडेर समर्थन फिर्ता लिँदै सरकारबाट बाहिरिएपछि प्रधानमन्त्री पुष्पकमल दाहाल प्रचण्डले असार २८ गते विश्वासको मत लिन लागेका हुन् । यस्तै, अशोक राई नेतृत्वको जसपा पनि सरकारबाट बाहिरिसकेको छ ।