काठमाडौं । नेकपा (एमाले) का अध्यक्ष तथा पूर्व प्रधानमन्त्री केपी शर्मा ओलीले वर्तमान सरकारले भ्रष्टाचार लुकाउने प्रयास गरिरहेको आरोप लगाएको छ ।
उनले भने, ‘सरकारको संलग्नता नहुँदासम्म एयरपोर्टजस्तो संवेदनशील क्षेत्रबाट सय किलो सुन निकासा हुनै सक्दैन, केही काम गरेको देखाएर भ्रष्टाचार लुकाउन सरकार लागि परेको छ ।’
पुर्व प्रधानमन्त्री ओलीले नेपालगन्जमा शनिवारदेखि सुरु भएको लुम्बिनी प्रदेशका सबै तहका एमालेबाट विजयी जनप्रतिनिधिको दुई दिने प्रशिक्षण कार्यक्रमको उदघाटन गर्दै सो कुरा बताए ।
उनले सरकारले आफुलाई भ्रष्टाचार विरोधी भनेर जति हल्ला मच्चाइए पनि देशमा भ्रष्टाचार झनै मौलाएको हुनाले एमालेले गम्भीर भएर समीक्षा गरिरहेको बताए ।
एमाले अध्यक्ष ओलीले अहिलेको सरकार सुशासनको पक्षमा नरहेको र राष्ट्रप्रतिको जिम्मेवारीबोध पनि सरकारलाई नभएको आरोप लगाएका छन् । उनले थपे, ‘अन्तर्राष्ट्रिय विमानस्थल हुँदै सय किलो सुन विनासुइँको छिर्नु चानचुने कुरा होइन । यसबाट विमानस्थलबाट जे पनि छिराउन सकिने देखिएकाले शान्ति सुरक्षाका लागि ठूलो चुनौती थपिएको छ ।’
प्रमुख प्रतिपक्षी दलका नेता समेत रहनुभएका ओलीले एमालेबाट निर्वाचित भएका जनप्रतिनिधिले सम्बन्धको आधारमा सिफारिस नगर्न निर्देशन दिंदै यो कुरा पार्टीका लागि घातक बन्न सक्ने बताए ।
उनले एमालेका जनप्रतिनिधिले गलत कार्यमा सिफारिस गर्न नहुने जनाउँदै जनप्रतिनिधि बदनाम हुनु भनेको पार्टी बदनाम हुनु हो भने । अध्यक्ष ओलीले एमाले पार्टीको मिसन ८४ लाई कसरी सफल बनाउनेतिर सबै नेता कार्यकर्ताले ध्यान दिन सबै तहका जनप्रतिनिधिलाई सो अवसरमा निर्देशन दिए ।
मिसन ८४ लाई लक्षितगरी ८४ सम्म योजनाबद्व तरिकाले जनतामुखी समाजसेवामा खट्न आग्रह गरेका छन् । दुई दिनसम्म चल्ने सो प्रशिक्षण कार्यक्रममा लुम्बिनी प्रदेशका १२ जिल्लाका तीनै तहका जनप्रतिनिधिको सहभागिता रहेको छ ।
प्रकाशित मितिः २०८० साउन १३ शनिबार
्
Comments