१४ असार। दक्षिण कोरियासँग पराजित हुँदै साविकको विजेता जर्मनी विश्वकपको समूह चरणबाटै बाहिरिएको छ । हिजो राति भएको समूह चरणको अन्तिम खेलमा कोरियाले जर्मनीलाई २–० हराउँदै जर्मनी विश्वकपको समूह चरणबाटै बाहिरिएको हो । कोरियाले भने विश्वकपमा जर्मनीलाई पहिलो पटक हराएको हो ।
कोरियाले दुवै गोल दोस्रो हाफको इन्जुरी टाइममा गरेको हो । किम योङगवनले इन्जुरी टाइमको तेस्रो तथा एच सनले इन्जुरी टाइमको छैटौं मिनेटमा गोल गरेका हुन् ।
जर्मनी पहिलो खेलमा मेक्सिकोसँग १–० गोलले पराजित भएको थियो भने दोस्रो खेलमा जर्मनीले स्विडेनलाई पराजित गरेको थियो ।
योसँगै अर्को अनौठो संयोग र नियति पनि जर्मनीले ब्यहोरेको छ । लगातार तीन विश्वकपमा साविक विजेता समूह चरणबाटै घर फर्किएको छ ।
सन् २००६ को इटली २०१० मा, २०१० को विजेता स्पेन २०१४ को विश्वकपमा समूह चरणबाटै घर फर्किएका थिए । त्यस्तै सन् १९९८ को विश्वकप विजेता फ्रान्स पनि सन् २००२ को विश्वकपमा समूह चरणबाटै बाहिरिएको थियो ।
समूहमा स्विडेन र मेक्सिकोले समान ६ अंक जोडे । विश्व कपबाट बाहिरिएका दक्षिण कोरिया र जर्मनीको समान ३ अंक रह्यो ।
Comments