काठमाडौं । फिफा सहायक रेफ्री पदम बहादुर भुजेल फिफा ब्याज लिएर सम्पर्क विहिन भएका छन् । अखिल नेपाल फुटबल संघ (एन्फा)को आयोजनामा सञ्चालन भईरहेको शीर्ष डिभिजनको लिग छाडेर पदम विदेशिएका हुन् ।
काठमाडौंमा सहिद स्मारक ए डिभिजन लिगका खेल चलिरहँदा पदम रोयल गार्डका लागि दुबईतर्फ लागेको बुझिएको छ ।
शीर्ष डिभिजनको लिग अगाडी एन्फाले १२ जना महिला तथा पुरुष रेफ्रीलाई फिफा ब्याज २०२० हस्तान्तरण गरेको थियो । जसमा पदम समेत सहभागी थिए ।
हाल एन्फामा ४ पुरुष फिफा रेफ्री, ६ सहायक पुरुष रेफ्री रहेका छन् । यस्तै महिलातर्फ समान एक एक जना रेफ्री र सहायक रेफ्रीमा छन् ।
एन्फाले हरेक बर्ष नेपालमै फिटनेश जाँच गर्दै रेफ्रीको नविकरण गर्न एएफसीमा नाम पठाउने गरेको छ । पछिल्लो समय रेफ्री ब्याजको नविकरण नेपालमै हुँदै आएको छ ।
एन्फाले सेप्टेम्बर अन्तिम साता फिफालाई नाम पठाउने गरेको छ । सोही महिनाको अन्तिम सातामा फिफाले एन्फाले पठाएको नामलाई स्विकृती प्रदान गर्दै आएको छ ।
फिफाले स्विकृत गरेको नामलाई एन्फाले फिफा ब्याज दिदै आएको छ । यसपटक भने एन्फाले डिसेम्बरको अन्तिम साता १२ रेफ्रीलाई ब्याज हस्तान्तरण गरेको थियो ।
एन्फाले ब्याज दिने र आफु विदेशीने तय हुँदा हुँदै पदमले ब्याज लिएकोमा अन्य रेफ्रीले गुनासो गरेका छन् ।
लिग खेलाईरहेका एक रेफ्री भन्छन् ‘आफु विदेश जाने तय भएको रहेछ । यस्तो अवस्था उनले पहिल्यै फिफा ब्याज छोड्नपर्ने थियो । नयाँले मौका पाउन्थ्यो ।’
उमेरले ३५ कटिसकेका पदकले सन् २००७ मा बेसिक रेफ्री कोर्ष गरेका थिए । उनले सन् २०११ बाट फिफा ब्याज पाउदै आएका थिए । चालू लिगमा ३ खेलमात्रै खेलाएका उनी त्यसयता भने देखिएका छैनन् ।
यता, रेफ्री संघलाई भने पदमको बारेमा कुनै जानकारी आएको छैन । पदमले पारिवारिक समस्या देखाउँदै संघबाट छुट्टी लिएको संघका पदाधिकारी बताउँछन् ।
रेफ्री कमिटीका सदस्य बुद्धि गुरुङ यस विषयमा आफुलाई कुनै जानकारी नभएको बताउँछन् ।
‘पदम बाहिर गएको कुनै जानकारी भएको छैन । उनले केही समय अघि बुबा बिरामी हुनुहुन्छ भनेर बिदा मागेका थिए । मैले हुन्छ भनेको हो । तर विदेश गएको कुनै जानकार आएको छैन ।’ उनी भन्छन् ।
गुरुङले अन्तिम पटक पदमको श्रीमतीलाई फोन गर्दा घर गएको जानकारी गराएका थिए ।
सत्य तथ्य बुझेपछि संघले पदमलाई कारबाही गर्ने गुरुङले बताएका छन् ।
एन्फाले २० जना ए श्रेणीका रेफ्रीलाई लिगका लागि स्विकृती प्रदान गरेको छ । जसमा पदम पनि छन् ।
फिफा रेफ्रीसँगै एएफसीले आफ्नो एकेडेमीबाट उत्पादित एलिट प्यानल रेफ्रीको प्रयोग गर्दै आईरहेको छ ।
सन् २००० बाट सुरु एलिट प्यानलमा पुर्व रेफ्री ज्ञानीराजा श्रेष्ठ, सुरेन्द्र सिख्राकार, श्याम लामा र विनोद के सीले एएफसीले आयोजना गर्ने केही खेल सञ्चालन गरेका छन् । रेफ्री करियरबाट टाढिएका चारै जनालाई उच्च श्रेणीको मानिन्छ ।
पदम बेपत्ता भएपछि अब राष्ट्रिय सहायक रेफ्रीहरु किसन यादव, बिक्रम चौधरी र गणेश चौधरी मध्य एकले रिक्त रहेको ब्याज पाउने छन् । कमिटी सदस्य गुरुङ प्रतिस्पर्धाबाट एक रेफ्रि चयन हुने बताउँछन् ।
हाल फिफा रेफ्री स् सुदिस कुमार पाण्डे, नविद्र महर्जन, श्रवण कुमार तामाङ, कविन ब्यन्जनकार र अस्मिता मानन्धर
फिफा सहायक रेफ्री: रोजेन श्रेष्ठ, नानि राम थापा, पदक बहादुर भुजेन गायब, माधब खत्री, युनाल मल्ल, सहदेभ श्रेष्ठ र बिना श्रेष्ठ
प्रकाशित मितिः २०७६ माघ १२ आइतबार
Comments