शीर्ष स्थानको होडमा रहेको सेभिल्ला पराजित

एजेन्सी, १७ माघ । स्पेनिस ला लिगामा शीर्ष स्थानको होडमा रहेको सेभिल्ला पराजित भएको छ । गएराति भएको खेलमा स्पानियोलसँग ३–१ ले हारेको सेभिल्लाले बार्सिलोनालाई पछि पारिरहने तथा रियल मड्रिडसँगको अंक दूरी कम गर्ने मौका गुमायो ।
स्पानियोलको जितमा जोस एन्टोनियो, मार्क नावार्रो र जेरार्ड मोरेनोले गोल गरे । पहिलो हाफमा नै निको पारेजा रातो कार्ड खाँदै मैदानबाट बाहिरिएपछि सेभिल्ला १० खेलाडीमा सीमित भएको थियो । सेभिल्लाका लागि स्टिभन जोवेटिकले एक गोल फर्काए । हारपछि सेभिल्ला तेस्रो स्थानमा झरेको छ र उ शीर्ष स्थानको रियल मड्रिड भन्दा चार अंकले पछि छ ।
शीर्ष स्थानको रियल मड्रिडको १९ खेलबाट ४६ अंक भएको छ । एक खेल बढी खेलेका बार्सिलोना र सेभिल्लाको समान ४२ अंक छ । गोल अन्तरका आधारमा बार्सिलोना सेभिल्लालाई पछि पार्दै दोस्रो स्थानमा उक्लिएको छ ।
गएराति नै भएको अर्को खेलमा एथ्लेटिको बिल्बाओले स्पोर्टिङ गिजोनलाई २–१ ले हराएको छ ।