काठमाडौं । गत वर्ष भएको युरोकप फुटबल अन्तर्गत हृदयघात भएर मैदानमै ढलेका डेनिस फुटबलर क्रिस्टिएन एरिक्सन प्रिमियर लिगमा फर्किएका छन् । प्रिमियर लिग क्लब ब्रेन्टफोर्डले मिडफिल्डर एरिक्सन यस सिजनको बाँकी अवधिका लागि अनुबन्ध गरेको छ ।
दुई वर्षपछि प्रिमियर लिगमा फर्केका २९ वर्षीय एरिक्सनलाई ब्रेन्टफोर्डले ६ महिनाका लागि अनुबन्ध गरेको हो । ‘हामीले विश्व स्तरीय खेलाडीलाई ब्रेन्टफोर्डमा ल्याउने अविश्वसनीय अवसर लिएका छौं,’ ब्रेन्टफोर्डका मुख्य प्रशिक्षक थोमस फ्रान्कले भने ।
यसअघि प्रिमियर लिग क्लब टोटनहमबाट खेलेका एरिक्सन २०२० मा इटालियन क्लब इन्टर मिलान गएका थिए । तर, युरोकप दौरान फिनल्याण्डविरुद्धको खेलमा हृदयघातपछि एरिक्सनले फुटबल खेलेका छैनन् ।
त्यसपछि इन्टरसँग पनि उनको सम्झौता रद्द गरेका थिए । हृदयघात भएपछि उनले मुटुमा इम्प्लान्टेड कार्डियोभेर्टर डेफिब्रिलेटर आइसिडी जडान गरिएको छ । जसका कारण इटालीमा उनले फुटबल खेल्न नपाउने भएका कारण इन्टर मिलानले एरिक्सनलाई रिलिज गरेको थियो ।
केही दिनअघि एरिक्सनले डच क्लब आयाक्सको रिजर्भ टिमसँग प्रशिक्षण गरिरहेका थिए । एरिक्सनले इन्टरका लागि २६ खेल खेलेका थिए । इन्टरले ११ वर्षपछि सिरी ए को उपाधि जित्दा एरिक्सन पनि सदस्य थिए ।
प्रकाशित मिति: २०७८ माघ १७ सोमबार
Comments