भक्तपुरमा पुरुष भन्दा महिला कोरोना संक्रमित बढी

भक्तपुर । भक्तपुरमा पुरुषको तुलनामा महिलामा बढी कोरोना संक्रमण देखिएको छ । स्वास्थ्य कार्यालय भक्तपुरले आज पत्रकार सम्मेलन गरी सो कुराको जानकारी दिएको हो ।

कार्यालयका प्रमुख कृष्ण मिजारका अनुसार भक्तपुरमा आजसम्ममा ४८ जनामा कोरोना संक्रमण देखिएकोमा २९ जना महिला छन् र बाँकी १९ जना पुरुष रहेका छन् ।

कोरोना संक्रमित मध्ये १८ महिला र १२ पुरुष गरी जम्मा ३० जना उपचारपछि घर फर्किएका छन् । अब ११ महिला र ७ पुरुष गरी जम्मा १८ जना उपचारका लागि अस्पतालमा रहेको प्रमुख मिजारले बताए ।

भक्तपुर जिल्लामा आजसम्म २ हजार २ सय ८९ जनाको पिसिआर परीक्षण भएको र १ हजार ९३३ जनाको आरडिटी परीक्षण भएको स्वास्थ्य कार्यालयले जनाएको छ । हाल भक्तपुरमा १७१ जना विभिन्न स्थानमा रहेका क्वारेन्टाइनमा बसेका छन् ।

प्रकाशित मितिः २०७७ साउन ०१ बिहिबार