कोरम नपुगेपछि अर्थ समितिको बैठक स्थगित

काठमाडौं । कोरम नपुगेपछि संघीय संसद, अर्थ समितिको बैठक बिहीबार पनि स्थगित भएको छ ।

बिहीबार बिहान ११ बजेका लागि सिंहदरबरमा बोलाइएको बैठकमा समितिका सदस्यहरूको गणपुरक संख्या नपुगेपछि बैठक स्थगित गरिएको हो ।

नागरिक लगानी कोष ऐन, २०४७ लाई संशोधन गर्न बनेको विधेयक’ माथि छलफल गर्न बोलाइएको बैठकमा समितिका सभापति कृष्णप्रसाद दाहालले १ घण्टा कुर्दा पनि केही सदस्य मात्र आएपनि बहुमत सदस्यहरूको उपस्थित नभएपछि बैठक स्थगित गर्नुपरेको समितिको सचिवालयले जनाएको छ ।

समितिको यसअघि कात्तिक १९ गते बोलाइएको बैठकमा पनि कोरम नपुगेकै कारण स्थगित गरिएको थियो ।

प्रकाशित मितिः २०७६ कार्तिक २८ बिहीबार