काठमाडौं । ललितपुर मेयर कप टी २० महिला क्रिकेट प्रतियोगितामा प्रदेश एकले विभागिए टिम एपीएफ क्लवलाई मात्र ५८ रनको लक्ष्य दिएको छ । कीर्तिपुर मैदानमा टस जितेर पहिले ब्याटिङ गरेको प्रदेशले २० ओभरमा नौं विकेट गुमाउँदै ५७ रन बनायो ।
उसका लागि एक खेलाडीले मात्र दोहोरो अंक जोड्न सके । जसमा सबनम राईले सर्वाधिक १६ रन बनाइन । खराब सुरुवात गरेको प्रदेश एकले मात्र चार रनमा पहिलो विकेट गुमाएको थियो । त्यसपछि उसले स्कोरबोर्डमा ३५ रन थप्दा महत्वपुर्ण पाँच विकेट झरेको थियो ।
उसकी ओपनर काजल श्रेष्ठ मात्र पाँच रनमा आउट भइन भने कप्तान रुविना क्षेत्रीले खाता खोल्न सकिनन् । यस्तै अप्सरी बेगपनि सात रनमा पेभेलियन फर्किदा संगिता राईले रन जोड्न सकिनन् ।
नग्मी तामाङपनि पाँच तथा लकिता राजवंशी ६ रनमा आउट हुँदा प्रदेश एकको पारी धरापमा परेको थियो । उसको विकेट झर्ने क्रम यतिमा रोकिएन । प्रज्ञा कटुवाल एक रनमा पेभेलियन फर्किदा निशा शाहले खाता खोल्न सकिनन् । यस्तै ज्योती दनवार दुई रनमा आउट भइन ।
बलिङमा एपीएफका लागि करुणा भण्डारीले तीन तथा राजमती ऐरीले दुई विकेट लिइन । यस्तै सुमन विष्ट र रेखा रावलले एक विकेट लिइन ।
प्रकाशित मितिः २०७८ फागुन १० मंगलबार
Comments