काठमाडौं । अधिकांश कोरोना भाइरसबाट सङ्क्रमित व्यक्तिले छाती दुखाइको अनुभव गरेको बताएका छन् ।
छाती दुखाइ वा छातीमा असुविधाको अनुभव हुनु एक्लो कोभिडको लक्षण नहुन सक्छ । प्रायः अन्य लक्षणहरूको परिणामस्वरूप सङ्क्रमित व्यक्तिले छाती दुखाइ देखा परिरहेको हुन्छ । सङ्क्रमित व्यक्तिले छाती भारी भएको, तीव्र दुखाइ अनुभव गर्छन् । कहिलेकाहीँ हिँडडुल गर्दा वा सास फेर्दा मात्र पनि छाती दुखेको महसुस हुनसक्छ ।
कोरोना भाइरसको कारण हुने छाती दुखाइ सम्भवतः माथिल्लो श्वासप्रश्वास प्रणालीमा भएको सङ्क्रमणको परिणाम हो । र, यो समस्या कहिल्यै एक्लो आउँदैन भनेर बुझ्न महत्त्वपूर्ण हुन्छ । अत्यधिक खोकी लागेमा पनि छाती दुख्न सक्छ । सुक्खा खोकी कोभिडको सामान्य लक्षण हो । लगातार र गम्भीर प्रकारको खोकीले पनि छाती दुख्न सक्छ ।
खोकीले सास फेर्न गाह्रो बनाउनुका साथै छातीको मांसपेशीमा भएका टिस्यु च्यातिन सक्छ जुन गम्भीर असुविधाको कारण बन्न सक्छ । कोभिडका कारणले भएको निमोनियाले पनि छातीमा समस्या हुनसक्छ । निमोनिया फोक्सोभित्र रहेको वायु थैली सुन्निएमा र त्यहाँ तरल पदार्थ भरिन थालेमा हुने जटिलता हो । कोभिड निमोनिया भएका मानिसलाई तत्काल चिकित्सकीय उपचार आवश्यक हुन्छ ।
फोक्सो सुन्निएर पनि छाती दुख्न सक्छ । त्यस्तै, कुनै पनि मुटुको समस्या भएका मानिसमा वा मुटुरोगको जोखिम भएका मानिसमा कोभिडको कारणले छाती दुख्ने समस्या निम्तिन सक्छ । शरीरमा तीव्र गतिमा भाइरस फैलिएमा यसले मायलजिया, मायोकार्डिटिस र अन्य जटिल हृदय समस्याहरू हुनसक्छ । भाइरस रक्तनलीमा फैलिएमा यसले पल्मोनरी एम्बोलिजम निम्त्याउन सक्छ । जमेको रगत फुटेर फोक्सोमा फैलिएमा यसले गहिरो पीडा हुन्छ र गम्भीर अवस्थामा फोक्सोमा रगत प्रवाहलाई प्रतिबन्ध गर्छ । जसको परिणाम स्वरुप छाती दुख्ने हुन्छ ।
कोभिडका बिरामीहरूमा छाती दुख्ने समस्या भए यसलाई बेवास्ता नगरी तुरून्त चिकित्सकको परामर्श लिनुपर्ने हुन्छ ।
प्रकाशित मितिः २०७८ बैशाख २५ शनिबार
Comments