काठमाडौं । चेन्नई सुपर किङ्सले युएईमा जारी १३ औं संस्करणको इन्डियन प्रिमियर लिग (आईपीएल) टी–२० क्रिकेटमा तेस्रो जित निकालेको छ । दुबईमा मंगलबार राति भएको खेलमा सनराइजर्स हैदराबादलाई २० रनले पराजित गर्दै चेन्नईले तेस्रो जित निकालेको हो ।
दुबई अन्तराष्ट्रिय क्रिकेट स्टेडियममा चेन्नईले दिएको १ सय ६८ रनको विजयी लक्ष्यसहित ब्याटिङ गरेको हैदराबादले ८ विकेटको नोक्सानीमा १ सय ४७ रनमात्र बनाउन सक्यो ।
हैदराबादका लागि केन विलियम्सनले ५७ रन बनाए पनि टोलीलाई जित दिलाउन सकेनन् । चेन्नईका कर्ण शर्मा र ड्वाने ब्राभोले २–२ विकेट लिए ।
यसअघि टस जितेर पहिले ब्याटिङ गरेको चेन्नईले ६ विकेटको नोक्सानीमा १ सय ६७ रन बनाएको थियो । चेन्नईका लागि शेन वाट्सनले सर्वाधिक ४२ रन बनाए । अम्बाती रायडुले ४१ रन जोड्दा साम करनले ३१ रन बनाए ।
कप्तान महेन्द्र सिंह धोनी २१ रनमा आउट भए । हैदराबादका सन्दीप शर्मा, खलिल अहमेद र टि नटराजनले २–२ विकेट लिए ।
अंक तालिका
जितसँगै चेन्नईले हैदराबादविरुद्ध बदला लिएको छ । यसै सिजनको पहिलो भेटमा चेन्नईलाई हैदराबादले ७ रनले पराजित गरेको थियो ।
जितसँगै चेन्नईले ८ खेलमा ६ अंक जोडेको छ । चेन्नई छैटौं स्थानमा उक्लिएको छ । हैदराबादको यो पाँचौ हार हो । हैदराबाद ८ खेलमा ६ अंक जोडेर पाँचौ स्थानमा रहेको छ ।
मुम्बई इन्डियन्स, दिल्ली क्यापिटल्स र रोयल च्यालेन्जर्स बैंगलोरको समान १० अंक छ । कोलकाता नाइट राइडर्सको ८ अंक छ भने राजस्थान रोयल्सको ६ अंक छ । पुछारको किंगस इलाभेन पन्जाबको २ अंक मात्रै छ ।
बुधबारको खेल
आईपीएलको १३ औँ सीजनको ३० औँ म्याचमा आज दिल्ली क्यापिटल्स र राजस्थान रोयल्सबीच खेल हुँदैछ । आज ७ः४५ बजे दुबईमा हुने खेलमा दुबै टीम खेल जित्ने मनशायका साथ मैदान उत्रिँदै छन् ।
सीजनमा यी दुई टिम दोश्रो पटक भीडिरहेका छन् । शारजाहमा भएको खेलमा यो भन्दा अगाडि रास्थानलाई दिल्लीले ४६ रनले पराजित गरेको थियो । यो भन्दा पहिला पनि दिल्लीसँग राजस्थान तीन म्याचमा हारिसकेको छ ।
यो खेलमा पनि सन्दीप लामिछाने खेल्ने सम्भावना कम रहेको बुझिन्छ । दिल्लीबाट खेल्दै आएका सन्दीपले अहिलेसम्म एक खेल पनि खेल्न पाएका छैनन् ।
प्रकाशित मितिm २०७७ असोज २८ बुधबार
Comments