काठमाडौं । ब्राजिली फुटबल संघले राष्ट्रिय महिला टिमका खेलाडीलाई समेत पुरुष सरहको सेवा सुविधा दिने भएको छ । ब्राजिलले अन्तराष्ट्रिय प्रतियोगिताको दौरान सबै फुटबल खेलाडीको दैनिक भत्ता तथा पुरस्कार रकम बराबर गर्ने भएको हो ।
संघका अध्यक्ष रोजरिया काबोकोले यसबर्षको मार्चबाट निर्णय कार्यान्वयनमा आएको बताएका छन् । ‘यो बर्षको मार्चबाट पुरुष तथा महिला फुटबलको दैनिक भत्ता तथा पुरस्कारमा समान मुल्य बनाइएको छ ।’ उनले भनेका छन् ।
‘राष्ट्रिय टिममा रहँदा खेलाडीले समान रुपमा कमाई गर्नेछन् । पुरुषले प्राप्त गर्ने रकम सरहनै महिलाले समेत प्राप्त गर्नेछन् ।’ उनले थपे । अध्यक्ष काबोकेले संघले गरेको निर्णय अन्तराष्ट्रिय प्रतियोगिताहरु विश्वकप र ओलम्पिकमा समेत लागू हुने बताएका छन् ।
‘कुनै लैङ्गिक विभेद हुने छैन । ब्राजिली फुटबल संघले महिला तथा पुरुषलाई बराबरी रुपमा मान्नेछ ।’ उनले भने । ‘अर्को बर्ष ओलम्पिकमा जित हासिल गरेपनि उनीहरुसंग त्यही हुनेछ, जो पुरुषहरुले पाउनेछन् ।’ उनले थपे ।
अष्ट्रिया, नर्वे तथा न्युजिल्याण्ड सहितका धेरै देशले महिला तथा पुरुष खेलाडीलाई समान तलब सुविधा उपलब्ध गराउँदै आएका छन् । ब्राजिली महिला टिमले मार्चयता खेलेको छैन । कोरोना भाईरसको महामारीका कारण अन्तराष्ट्रिय प्रतियोगिता स्थगित हुँदा राष्ट्रिय टिमले कुनै प्रतिस्पर्धा गर्न पाएको छैन । एजेन्सी
प्रकाशित मितिः २०७७ भदौ १८ बिहिबार
Comments