एकैदिन सुनको भाउ १२ हजार ५ सयले घट्यो

नेपालमा आइतबार सुनको भाउ एकैदिन तोलामा १२ हजार ५ सय रुपैयाँले घटेको छ। नेपाल सुनचाँदी व्यवसायी महासंघ ले यस दिनका लागि सुनको मूल्य प्रतितोला २ लाख ८२ हजार रुपैयाँ निर्धारण गरेको जनाएको छ।

अघिल्लो दिन सुन प्रतितोला २ लाख ९४ हजार ५ सय रुपैयाँमा कारोबार भएको थियो। यससँगै एक साताको अवधिमा सुनको भाउ कुल २७ हजार ४ सय रुपैयाँले घटेको छ।

गत आइतबार सुन प्रतितोला ३ लाख ९ हजार ४ सय रुपैयाँमा कारोबार भएको थियो भने गत माघ १५ गते हालसम्मकै उच्च मूल्य प्रतितोला ३ लाख ३९ हजार ३ सय रुपैयाँ पुगेको रेकर्ड छ।

अन्तर्राष्ट्रिय बजारमा तेलको मूल्य बढ्दा विभिन्न देशहरूले अमेरिकी डलरको माग बढाएका छन्। सुन बिक्रीबाट डलर आपूर्ति बढेसँगै अन्तर्राष्ट्रिय प्रभावका कारण सुनको भाउमा गिरावट आएको बताइएको छ।