डेनमार्कलाई पराजित गर्दै पोर्चुगल सेमिफाइनलमा प्रवेश

काठमाडौं । डेनमार्कलाई क्वाटरफाइनलमा पराजित गर्दै पोर्चुगल युइएफए नेसन्स लिगको सेमिफाइनलमा प्रवेश गरेको छ । क्वाटरफाइनलको दोस्रो लेगमा आइतवार ५–२ को जित निकालेको पोर्चुगल समग्रमा ५–३ अग्रतासहित अघि बढेको हो । पहिलो लेगमा डेनमार्क १–० ले विजयी भएको थियो ।

पोर्चुगललाई घरेलु मैदानमा जित दिलाउन फ्रान्सिस्को ट्रिन्काओले २ , क्रिस्टियानो रोनाल्डो र गोन्सालो रामोसले समान १ गोल गरे । १ गोल डेनमार्कले पोर्चुगललाई उपहारस्वरुप दिएको थियो । डेनमार्कका लागि भने क्रिस्टियन इरिक्सन र रामसुस क्रिस्टेन्सेनले गोल गरे ।

सन् २०१९ मा नेसन्स लिगको पहिलो संस्करण जितेको पोर्चुगल सोही लय दोहोर्‍याउने लक्ष्यमा छ । पोर्चुगलले अब जुन महिनामा आयोजना हुने अन्तिम ४ मा आयोजक जर्मनीसँग प्रतिस्पर्धा गर्नेछ ।