दिल्लीका मुख्यमन्त्री आतिशीद्वारा राजीनामा

काठमाडौं । दिल्लीका मुख्यमन्त्री आतिशी मर्लेनाले आज पदबाट राजीनामा दिएकी छन् । विधानसभा चुनावमा आफ्नो पार्टीको पराजयपछि आम आदमी पार्टी (आप) की नेत्री आतिशीले पदबाट राजीनामा दिएकी हुन् ।

उनले राज निवासमा उपराज्यपाल भिके सक्सेनालाई आफ्नो राजीनामा बुझाएकी हुन् ।

आतिशी गत सेप्टेम्बरदेखि दिल्लीको मुख्यमन्त्रीको रूपमा कार्यरत थिइन् । अरविन्द केजरीवालले आफ्नो पदबाट राजीनामा दिएको केही दिनपछि उनी मुख्यमन्त्री भएकी थिइन् ।

दिल्ली विधानसभा निर्वाचनमा आप (आम आदमी पार्टी) ले ठूलो झट्का बेहोरेको छ । आपले आफ्नो पहिलेको ६२ सिटको तुलनामा मात्र २२ सिट मात्र जित्न सकेको छ ।

आम आदमी पार्टीलाई सत्ताच्यूत गरेर २७ वर्षपछि राष्ट्रिय राजधानीमा सत्तामा फर्किएको भारतीय जनता पार्टी (भाजपा) ले दिल्ली चुनावमा ऐतिहासिक जनादेश प्राप्त गरेको छ ।