एपिएफले जित्यो महिला लिग

काठमाडौं । एपिएफ क्लबले एन्फा महिला लिगको उपाधि जितेको छ ।

त्रिपुरेश्वरस्थित दशरथ रंगशालामा आज सम्पन्न खेलमा एपिएफले नेपाल पुलिस क्लबलाई ४–० ले पराजित गर्दै महिला लिगको उपाधि जितेको हो । अपराजित रहँदै एपिएफ च्याम्पियन बनेको छ ।

एपिएफलाई उपाधि दिलाउन सविता रानामगरले दुई गोल गरिन् भने सरु लिम्बू र अनु लामाले समान एक गोल गरे ।

खेलको ६४ औं मिनेटमा सविताको गोलमार्फत एपिएफले सुरुआती अग्रता लियो । त्यसको ६ मिनेटपछि नै सरुले नै अग्रता दोब्बर बनाइन् । ८४ औं मिनेटमा सविताले व्यक्तिगत दोस्रो र टोलीका लागि तेस्रो गोल गरिन् । यसैगरी, इन्जुरी समयमा वैकल्पिक खेलाडी अनुले गोल गर्दै एपिएफको ४–० को जित दिलाइन् ।

उपाधिसँगै एपिएफले नगद १० लाख प्राप्त गरेको छ भने उपविजेता पुलिसले ५ लाख प्राप्त गरेको छ ।