नेपालको सान्त्वना जित, मलेसिया ७ विकेटले पराजित

काठमाडौं । नेपालले आईसीसी यू–१९ महिला टी–ट्वान्टी विश्‍वकपमा सान्त्वना जित हासिल गरेको छ । नेपालले प्लेअफ खेलमा आज मलेसियालाई ७ विकेटले हराउँदै सान्त्वना जित हासिल गरेको हो ।

मलेसियाले दिएको ४६ रनको लक्ष्य पछ्याएको नेपालले ११ ओभरमा तीन विकेट गुमाउँदै ४७ रन बनायो । नेपालको जितमा कप्तान पूजाले नट आउट रहदै सर्वाधिक २३ रन जोडिन् । मलेसियाका लागि मार्साले ३ विकेट लिइन् ।

त्यसअघि टस जितेर पहिले ब्याटिङ गरेको मलेसियाले १६.५ ओभरमा अलआउट हुँदै ४५ रन बनाएको थियो । मलेसियाका लागि नुरिमानले सर्वाधिक १५ रन जोड्नु बाहेक अन्य ब्याटरले दोहोरो अंकमा रन बनाउँन सकेनन् ।

नेपालका लागि कप्तान पूजाले ४, रचना चौधरीले ३, रिया शर्मा र सिमाना केसीले समान एक विकेट लिए ।

नेपाल समूह चरणमा बंगलादेश, स्कटल्याण्ड र अस्ट्रेलियासँग हार व्यहोरेको थियो ।