भक्तपुरमा ट्रकले ठक्कर दिँदा स्कुटरमा सवार यात्रुको मृत्यु, सडक अवरुद्ध

भक्तपुर । भक्तपुरको गठ्ठाघरमा ट्रकले स्कुटरलाई ठक्कर दिँदा स्कुटरमा सवार यात्रुको ज्यान गएको छ।

जिल्ला प्रहरी परीसर भक्तपुरका अनुसार कोटेश्वरबाट भक्तपुर जाँदै गरेको ना ६ ख २१७३ नम्बरको ट्रकले नम्बर नखुलेको स्कुटरलाई ठक्कर दिँदा यात्रुको ज्यान गएको हो। ज्यान गुमाउने व्यक्तिको पहिचान खुलिसकेको छैन। घटनास्थलमा ज्यान गुमाएका व्यक्तिको झोला भेटिएको छ । त्यसमा किताब कपीहरू भेटिएका छन् । ज्यान गुमाउनेमा स्कुटरमा सवार विद्यार्थी रहेको बताइएको छ ।

घटना बिहीबार दिउँसो २ बजे आसपासमा भएको हो। प्रत्यक्षदर्शीका अनुसार कौशलटारबाट गठ्ठाघरतर्फ गइरहेको ट्रकले स्कुटरलाई ठक्कर दिएपछि करिब सय मिटरसम्म सोहोरेर लगेको थियो। सोहोरेर लगेपछि स्कुटरमा सवार महिला यात्रुको शरीर क्षतविक्षत भएको छ ।

अहिले घटनास्थल तनावग्रस्त रहेको र सडक अवरुद्ध भएको भक्तपुर प्रहरीले जानकारी दिएको छ। दुर्घटनापछि ट्रकमा तोडफोड गरिएको छ।