हिमालयन डिष्टिलरीको नाफामा ४६.५५ % को गिरावट

काठमाडौं । हिमालयन डिष्टिलरी लिमिटेडले गत आर्थिक वर्षको असार मसान्तसम्मको अपरिष्कृत वित्तीय विवरण सार्वजनिक गरेको छ। कम्पनीले सार्वजनिक गरेको वित्तीय विवरण अनुसार सञ्चालन आम्दानी घट्दा हिमालयन डिष्टिलरीको खुद नाफामा गिरावट आएको छ ।

गत आर्थिक वर्षको अन्त्यसम्ममा कम्पनीले ३५ करोड ३० लाख रुपैयाँ खुद नाफा आर्जन गरेको छ। यो अघिल्लो आर्थिक वर्षको सोही अवधिको तुलनामा ४६.५५ प्रतिशत कम हो। अघिल्लो आर्थिक वर्ष कम्पनीले ६६ करोड ५ लाख रुपैयाँ खुद नाफा कमाएको थियो। कम्पनीको सञ्चालन आम्दानी २६.५२ प्रतिशतले घटेर ४ अर्ब १५ करोड ५२ लाख रुपैयाँमा सीमित भएको छ ।

कुल नाफा ३०.३९ प्रतिशतले घटेर १ अर्ब २३ करोड १६ लाख रुपैयाँमा कायम भएको छ । कम्पनीको कुल सञ्चालन आम्दानी २७.१८ प्रतिशतले घटेर १ अर्ब २९ करोड ६१ लाख रुपैयाँका कायम भएको छ भने सञ्चालन मुनाफा ४४.११ प्रतिशतले घटेर ५३ करोड ३ लाख रुपैयाँमा सीमित भएको छ।

कम्पनीको प्रतिसेयर आम्दानी १३ रुपैयाँ ९८ पैसा घटेर १३ रुपैयाँ २१ पैसामा झरेको छ। कम्पनीको प्रतिसेयर नेटवर्थ १२५ रुपैयाँ १० पैसा रहेको छ । चुक्ता पूँजी २ अर्ब ६७ करोड २५ लाख रुपैयाँ रहेको कम्पनीको जगेडा कोषमा ६७ करोड ८ लाख रुपैयाँ सञ्चित छ।