त्रिभुवन विश्वविद्यालयमा स्नातक तह पहिलो वर्षको भर्ना खुल्यो

काठमाडौं । त्रिभुवन विश्वविद्यालयले स्नातक तह पहिलो वर्षमा भर्ना खुलाएको छ । शैक्षिक वर्ष २०८१/०८२ का लागि मानविकी तथा सामाजिक शास्त्र सङ्काय, व्यवस्थापन सङ्काय, शिक्षाशास्त्र सङ्काय र विज्ञान तथा प्रविधि अध्ययन संस्थान अन्तर्गतका क्याम्पसहरूमा भर्ना खुलेको हो ।

त्रिविको शिक्षाध्यक्ष कार्यालयकाअनुसार स्नातक तह पहिलो वर्षका लागि साउन २८ गतेदेखि भदौ मसान्तसम्म आवेदन फाराम बुझाउन सकिन्छ । असोजदेखि कक्षा सञ्चालन हुनेछ भने आउँदो वैशाखमा परीक्षा फाराम बुझाउनु पर्नेछ । जेठमा कक्षा समाप्त भएर असारमा अन्तिम परीक्षा हुने त्रिविले जनाएको छ ।

परीक्षा सकिएको तीन महिना अर्थात् असोजमा नतिजा प्रकाशन हुने पनि त्रिविले निकालेको सूचनामा उल्लेख छ । विद्यार्थीले प्रवेश चाहेको हरेक सङ्काय, अध्ययन संस्थान र विषयअनुसार क्याम्पसमा बेग्लाबेग्लै आवेदन फाराम बुझाउनु पर्ने शिक्षाध्यक्षको कार्यालयले जनाएको छ ।