देशकै ठूलो ४०० केभीको ढल्केवर सबस्टेसन निर्माण सम्पन्न

काठमाडौं । ढल्केवरमा ४०० केभीको सबस्टेसन तयार भएको छ । बुधबार रातिदेखि सो सबस्टेसन नो लोडमा चार्ज भएको नेपाल विद्युत प्राधिकरणले जनाएको छ।

उक्त सबस्टेसन हालसम्मकै उच्च क्षमताको हो। प्राधिकरणका १३२ र २२० केभीका मात्र सबस्टेसन थिए। सबस्टेशन बनेसँगै अब ढल्केवर-मुजफ्फपुर प्रसारण लाइनमा १२०० मेगावाटसम्म बिजुली प्रवाह गर्न सकिनेछ।

प्राधिकरणका प्रवक्ता मदन तिम्सिनाका अनुसार यसबाट विद्युत आयात र निर्यात गर्न निकै सजिलो हुने भएको छ। तामाकोसी जलविद्युत आयोजना ४५६ मेगावाट तयार हुँदैछ। सो ट्रान्समिसन लाइनबाट उक्त बिजुली प्रवाह गर्न सकिन्छ।

सबस्टेसनको २०७४/७५ देखि टेण्डर प्रक्रिया सुरू भएको थियो। करिब साढे दुई वर्षको निर्माण अवधिपछि सबस्टेसन तयार भएको हो। नेपाल र भारत बीचको ढल्केवार-मुजफ्फरपुर लाइन ४०० केभीका लागि तयार भए पनि सबस्टेसनको कारण सुरूमा १३२ केभी मात्र थियो। आर्थिक वर्ष २०७५र७६ मा २२० केभीमा चार्ज भएको थियो।

प्रकाशित मितिः २०७७ कार्तिक ०६ बिहिबार