कमलविनायकमा मोटरसाइकल पानीपुरीको गाडासँग ठोक्किँदा महिला गम्भीर घाइते

भक्तपुर । भक्तपुरको कमलविनायकमा मंगलबार राति मोटरसाइकल अनियन्त्रति भएर सडक छेउमा रहेको पानीपुरीको गाडामा ठोक्किँदा एक महिला गम्भीर घाइते भएकी छन् ।

गम्भीर घाइते हुनेमा पानी पुरी व्यवसायी सर्लाहीको बरहथवा घर भई हाल भक्तपुरकै कमलविनायक बस्दै आएकी ३५ वर्षीया मन्चोरदेवी दास बाँनिया रहेको प्रहरीले जनाएको छ ।

भत्केको पाटीबाट कमलविनायकतर्फ जाँदै गरेको प्रदेश ३, ०२–००३ प १८१५ नम्बरको मोटरसाइकल पानीपुरीको गाडामा ठोक्किँदा बाँनिया घाइते भएकी हुन् ।

प्रहरीका अनुसार उनको मध्यपुर अस्पताल ठिमीमा उपचार भैरहेको छ । दुर्घटनामा संलग्न मोटरसाइकल चालकलाई प्रहरी वृत्त जगातीले नियन्त्रणमा लिएको छ ।

प्रकाशित मितिः २०७६ असार ११ बुधबार