देशभरका स्थानमा बदली भइ पानी पर्ने

काठमाडौं । पूर्वबाट सक्रिय अवस्थामा नेपाल छिरेको मनसुन पश्चिम तिर जाने क्रममा रहेको जल तथा मौसम पूर्वानुमान महाशाखाले जनाएको छ । पश्चिम पुगिन सकेको भए पनि मनसुनको प्रभाव देशभर नै देखिएको मौसमविदले बताएका छन् । मनसुनकै कारण देशभरको मौसम शनिबारदेखि नै बदली भएको हो । देशभरका स्थानमा बदली भइ पानी पर्ने गतिविधि बढेको मौसमविदले बताए ।

लगातारको झरी पर्ने सम्भावना नरहे पनि दिनभरजसो बलदी भइ पानी पर्ने सम्भावना छ । केहीबेर घाम लागे पनि पुनः बदली भइ पानी पर्ने देखिएको छ । लगातारको झरी पर्नका लागि अझै केही समय लाग्ने मौसमविदले बताएका छन् ।

आइतबार पनि देशभरको मौसम बदलीको अवस्थामा छ । मध्य र पश्चिमका क्षेत्रमा सामान्यदेखि पूर्ण बदली र पूर्वमा आंशिकदेखि सामान्य बदली हुने सम्भावना छ ।

पूर्वका केही र मध्य तथा पश्चिमका धेरैजसो स्थानमा हल्कादेखि मध्यम वर्षाको सम्भावना रहेको छ । पश्चिम र मध्यका थोरै स्थानमा ठूलो पानी पर्ने देखिएको छ । उच्च पहाडी क्षेत्रमा हिमपातको सम्भावना पनि रहेको छ ।

प्रकाशित मितिः २०७६ असार ८ आइतबार