राजविराजमा सकेट बम फेला

राजविराज, २२ चैत । सप्तरीको राजविराज नगरपालिका– ४ स्थित कल्टुपोखरी छेउमा सकेट बम फेला परेको छ । स्थानीय व्यापारीको घरमा आज बिहान बम फेला परेको हो ।
स्थानीय विनोद चौधरी (दास) को घरको गेट अगाडि प्लास्टिकले बेरिएको अवस्थामा सकेट बम फेला परेको जिल्ला प्रहरी कार्यालय सप्तरीले जनाएको छ । चौधरी विद्युतीय ब्याट्रीको व्यापार गर्दै आएको व्यापारी हुन् ।
बम निस्क्रिय पार्नको लागि अहिले राजविराजस्थित कृष्ण गणबाट नेपाली सेना, जिल्ला प्रहरी कार्यालयबाट नेपाल प्रहरी र सशत्र प्रहरी त्यहाँ पुगेको सप्तरीका प्रहरी उपरीक्षक अनुराग द्विवेदीले बताए ।
बम फेला परेको ठाउँमा जयकृष्ण गोइत नेतृत्वको जनतान्त्रिक तराई मुक्ति मोर्चा (क्रान्तिकारी) को पर्चा समेत फेला परेको प्रहरीले जनाएको छ । बम फेला परेपछि स्थानीय त्रसित छन् ।