एथ्लेटिको मड्रिडले भ्यालेन्सियालाई हरायो

एजेन्सी, २३ फागुन । स्पेनिस ला लिगा अन्तर्गत गएराति भएको खेलमा एथ्लेटिको मड्रिड विजयी भएको छ । घरेलु मैदानमा भएको खेलमा एथ्लेटिको मड्रिडले भ्यालेन्सियालाई ३–० ले हराएको हो ।
एथ्लेटिकोको जितमा एन्टोनी ग्रिजम्यानले दुई तथा केविन गामेइरोले एक गोल गरे । १० औं मिनेटमा ग्रिजम्यानले गोल गर्दै एथ्लेटिकोलाई सुरुवाति अग्रता दिलाए । पहिलो हाफमा १–० ले अघि रहेको एथ्लेटिकोका लागि ४८ औं मिनेटमा गामेइरोले अर्को गोल गरे । ८३ औं मिनेटमा ग्रिजम्यानले व्यक्तिगत दोस्रो गोल गरेपछि एथ्लेटिको मड्रिड ३–० ले विजयी भयो ।
जितपछि एथ्लेटिको चौथो स्थानमा उक्लिएको छ । उसको २६ खेलबाट ४९ अंक भएको छ । एथ्लेटिको शीर्ष स्थानको बार्सिलोना भन्दा ११ तथा दोस्रो स्थानको रियल मड्रिड भन्दा १० अंकले पछि छ ।