एथ्लेटिको मड्रिड र सेभिल्ला विजयी

एजेन्सी, २ फागुन । स्पेनिस ला लिगा अन्तर्गत गएराति भएका खेलमा एथ्लेटिको मड्रिड र सेभिल्ला विजयी भएका छन् । घरेलु मैदानमा भएको खेलमा एथ्लेटिको मड्रिडले सेल्टा डि भिगोलाई ३–२ ले हराएको हो ।
एथ्लेटिकोका लागि फर्नान्डो टोरेस, यानिक काररास्को र एन्टोनी ग्रिजम्यानले गोल गरे । सेल्टाका लागि गुस्तावो काब्राएल र जोन गुइडेट्टीले गोल गरे । काब्राएलले पाँचौं मिनेटमा नै गोल गर्दै सेल्टालाई अग्रता दिलाएका थिए । तर ११ औं मिनेटमा टोरेसले एथ्लेटिकोका लागि बराबरी गोल फर्काए । ७८ औं मिनेटमा गुइडेट्टीले गोल गर्दै फेरि सेल्टालाई अग्रता दिलाए । तर ८६ औं मिनेटमा काररास्को तथा ८८ औं मिनेटमा ग्रिजम्यानले गोल गरेपछि एथ्लेटिको ३–२ ले विजयी भयो । ११ औं मिनेटमा एथ्लेटिकोका लागि गोल गरेका टोरेसले त्यसपछि पाएको पेनाल्टीमा भने गोल गर्न सकेनन् । उनले पेनाल्टीमा गोल गर्न नसकेको यो तेस्रो खेल हो ।
राति नै भएको खेलमा सेभिल्लाले लास पालमसलाई १–० ले हरायो । जितपछि तेस्रो स्थानको सेभिल्लाको २२ खेलबाट ४६ अंक भएको छ । सेभिल्ला दोस्रो स्थानको बार्सिलोना भन्दा दुई तथा शीर्ष स्थानको रियल मड्रिड भन्दा तीन अंकले पछि छ । चौथो स्थानमा उक्लिएको एथ्लेटिको मड्रिडको ४२ अंक भएको छ । शीर्ष स्थानको रियल मड्रिडको ४९ अंक छ र उसले दुई खेल कम खेलेको छ । राति भएका अरु खेलमा स्पोर्टिङ गिजोनले लेगानेसलाई २–० ले हरायो भने भिल्लारियल र मालागाले १–१ को बराबरी खेल्दै अंक बाँडेका छन् ।