बार्सिलोनाले गर्‍यो आधा दर्जन गोल

एजेन्सी, १ फागुन । स्पेनिस ला लिगा अन्तर्गत गएराति भएको खेलमा बार्सिलोनाले शानदार जित दर्ता गरेको छ । दोस्रो स्थानको बार्सिलोनाले एलाभेसलाई ६–० ले हराएको हो ।
बार्सिलोनाको शानदार जितमा लुइस स्वारेजले दुई तथा नेइमार, लियोनल मेस्सी र इभान रेकिटिकले एक एक गोल गरे । एलाभेसका रुआनो डेलगाडोले आत्मघाति गोल गरे । ३७ औं मिनेटमा स्वारेज तथा ४० औं मिनेटमा नेइमारले गोल गरेपछि पहिलो हाफमा बार्सिलोनाले २–० को अग्रता लियो । ५९ औं मिनेटमा मेस्सीले गोल गरेपछि बार्सिलोनाको अग्रता ३–० मा पुग्यो । ६३ औं मिनेटमा एलाभेसका डेलगाडोले बार्सिलोनाका लागि उपहार गोल गरे । उपहार गोल पाएको दुई मिनेटपछि नै रेकिटिकले गोल गर्दै बार्सिलोनाको अग्रता ५–० मा पुर्‍याए । खेल अवधिभर ७० प्रतिशत समय बल आफ्नो नियन्त्रणमा लिएको बार्सिलोनाका लागि स्वारेजले ६७ औं मिनेटमा व्यक्तिगत दोस्रो गोल गर्दै ६–० को जित निश्चित गरे । जितपछि बार्सिलोनाको २२ खेलबाट ४८ अंक भएको छ । दुई खेल कम खेलेको शीर्ष स्थानको रियल मड्रिडको ४९ अंक छ ।
राति भएका अरु खेलमा एथ्लेटिको बिल्बाओले डिप्रोटिभो डि लाकोरुनालाई २–१ ले हरायो । रियल बेटिस र भ्यालेन्सियाले गोल रहित बराबरी खेल्दै अंक बाँडे ।