काठमाडौंबाट पिकनिक खान पोखरा आएका एक विद्यार्थीको डुवेर मृत्यु

काठमाडौं, २१ माघ । काठमाडौंबाट शैक्षिक भ्रमणको लागि पोखरा आएका एक विद्यार्थीको फुस्रेखोलामा डुवेर मृत्यु भएको छ । काठमाडौंको बुढानिलकण्ठस्थित भ्याली पब्लिक स्कूलमा कक्षा १० का पेसल घिमिरे हिजो खोलामा डुवेर वेपत्ता भएका थिए । प्रहरीले आज बिहान पोखरा– १७ पावर हाउसस्थित खोलाबाट विद्यार्थीको शव निकालेको हो ।
काठमाडौंबाट पोखरा हुँदै लुम्बिनीका लागि हिँडेका उनीहरू दिउँसो पोखरा आएपछि चमेरो घुफाको भ्रमण सकेर फुस्रेखोला गएका थिए । भ्रमणमा आएका ९४ जना विद्यार्थी र १० शिक्षक मध्ये सात जना छात्र खोलामा पौडी खेल्न थालेका थिए । त्यसैक्रममा ६ जना बाहिर निस्किए तर पेसल निस्केनन् । काठमाडौं बाँसबारीका १६ वर्षीय उनको हिजो साँजसम्म फेला नपरेपछि आज बिहान पुनः खोजी गरिएको थियो ।
मृतक घिमिरेको शव परीक्षणका लागि पश्चिमान्चल क्षेत्रीय अस्पतालमा पठाइएको छ ।