एथ्लेटिको मड्रिडले एइबरलाई हराउँदै सेमिफाइनलमा पुग्ने सम्भावना बलियो बनायो

एजेन्सी, ७ माघ । एइबरलाई हराउँदै एथ्लेटिको मड्रिडले स्पेनिस कोपा डेल रे फुटबलको सेमिफाइनलमा पुग्ने सम्भावना बलियो बनाएको छ । क्वाटरफाइनलको पहिलो लेग अन्तर्गत गएराति भएको खेलमा एथ्लेटिको मड्रिडले एइबरलाई ३–० ले हराउँदै सेमिफाइनलमा पुग्ने सम्भावना बलियो बनाएको हो ।
घरेलु मैदानमा भएको खेलमा एथ्लेटिकोलाई जिताउन एन्टोनी ग्रिजम्यान, एन्जल कोरेया र केविन गामेइरोले गोल गरे । २८ औं मिनेटमा ग्रिजम्यानले गोल गरेपछि पहिलो हाफमा एथ्लेटिको मड्रिडले १–० को अग्रता लियो । ६० औं मिनेटमा कोरेया र ६८ औं मिनेटमा गामेइरोले गोल गर्दै एथ्लेटिकोलाई ३–० को जित दिलाए । दोस्रो लेग आउँदो बिहीबार हुनेछ ।