चेल्सीलाई सात अंकको अग्रता

एजेन्सी, २ माघ । चेल्सीले इंग्लिस प्रिमियर लिग अन्तर्गत गएराति भएको खेलमा साबिक विजेता लिसेस्टर सिटीलाई पराजित गरेको छ । यो सिजनका सर्वाधिक गोलकर्ता डिएगो कोस्टा बिना खेलेको चेल्सीले लिसेस्टरलाई उसकै मैदानमा ३–० ले हराउँदै सात अंकको अग्रता कायम गरेको छ ।
चेल्सीलाई जिताउन मार्कोस एलोन्सोले दुई तथा पेड्रोले एक गोल गरे । छैटौं मिनेटमा नै एलोन्सोले गोल गर्दै चेल्सीलाई सुरुवाति अग्रता दिलाए । पहिलो हाफमा १–० ले अघि रहेको चेल्सीका लागि ५१ औं मिनेटमा एलोन्सोले व्यक्तिगत दोस्रो गोल गरे । ७१ औं मिनेटमा पेड्रोले गोल गर्दै चेल्सीलाई ३–० को जित दिलाए ।
जितपछि शीर्ष स्थानको चेल्सीको २१ खेलबाट ५२ अंक भएको छ । चेल्सी दोस्रो स्थानको टोटनह्याम भन्दा सात अंकले अघि छ ।