६ हजार चार सय कछुवा बरामद

एजेन्सी, २८ पुस । भारतको उत्तर प्रदेशको अमेठीबाट प्रहरीले स्वच्छ पानीमा रहने ६ हजार चार सय कछुवा बरामद गरेको छ । कोलकाता बन्दरगाहमा लैजान लागिएका कछुवा प्रहरीले बरामद गरेको हो ।
बोरामा राखेर लैजान लागिएका जीवित कछुवाको तौल चार टन भन्दा धेरै रहेको भारतीय सञ्चारमाध्यमले जनाएका छन् । गंगा नदीको किनारबाट स्थानीय बासिन्दाले यि कछुवा संकलन गरेका थिए । प्रहरीले एक व्यक्तिलाई पक्राउ पनि गरेको छ । पक्राउ परेका व्यक्ति कछुवा तस्करीमा संलग्न ठूलो गिरोहका सदस्य रहेको सरकारी अधिकारीले बताएका छन् ।
बरामद गरिएका कछुवा लुप्त प्राजितका नरहेको र यस्ता कछुवालाई बंगलादेश लैजान लागिएको हुन सक्ने प्रहरीको अनुमान छ ।
चीन तथा दक्षिणपूर्वी एसियामा यि कछुवाको मासुको माग बढी छ ।