बार्सिलोनालाई पछि पार्दै सेभिल्ला दोस्रो स्थानमा

एजेन्सी, २४ पुस । स्पेनिस ला लिगामा बार्सिलोनालाई पछि पार्दै सेभिल्ला दोस्रो स्थानमा उक्लिएको छ । गएराति भएको खेलमा रियल सोसिडाडलाई ४–० ले हराएको सेभिल्ला बार्सिलोनालाई पछि पारेर दोस्रो स्थानमा उक्लिएको हो ।
सेभिल्लाको जितमा विस्साम बेन यड्डरले ह्याट्रिक गरे । यस्तै साराबिएले एक गोल गरे । यड्डरले २५, २९ र ८३ औं मिनेटमा गोल गर्दै ह्याट्रिक पूरा गरेका हुन् । उनले ह्याट्रिक पूरा गर्नु अघि ७३ औं मिनेटमा साराबिएले एक गोल गरेका थिए ।
यो जितपछि दोस्रो स्थानमा उक्लिएको सेभिल्लाको १७ खेलबाट ३६ अंक भएको छ । एक खेल कम खेलेको बार्सिलोनाको ३४ अंक छ ।
राति नै भएको अर्काे खेलमा एथ्लेटिको मड्रिडले एइबरलाई २–० ले हरायो । एथ्लेटिकोको जितमा साउल निगुएज र एन्टोनी ग्रिजम्यानले गोल गरे । जितपछि चौथो स्थानको एथ्लेटिकोको १७ खेलबाट ३१ अंक भएको छ । अर्को खेलमा लास पालमसले स्पोर्टिङ गिजोनलाई १–० ले हरायो ।