झण्डै पाँचलाख सहित १३ जुवाडे पान्डुबजारबाट पक्राउ

भक्तपुर, १५ मंसिर । जुवा खाल बस्नेहरुको संख्या बढ्दै गएता पनि भक्तपुर प्रहरीको सक्रियता हुन नसकेको गुनासोको आधारमा भक्तपुरको पाण्डुबजारबाट नगद सहित १३ जना जुवाडेहरुलाई प्रहरीले पक्राउ गरेको छ ।
महानगरीय प्रहरी आयुक्त रानीपोखरीबाट खटिएको बिशेष टोलीले सुराकीको आधारमा पाण्डुबजारस्थित सलामसिंह तामाङ्गको घरबाट पक्राउ गरेको हो । प्रहरीले जुवाको खालबाट १३ जुवाडेसहित नगद ४ लाख ९८ हजार पाँच सय रुपैया सहित १ सेट कौडा र १ सेट तास बरामद गरेको जगाती प्रहरी बृतका प्रमुख डिएसपी मित्रबन्धु शर्माले जानकारी दिए । पक्राउ परेकाहरुलाई जिल्ला अदालतबाट म्याद थप गरि अनुसन्धान प्रक्रिया अगाडि बढाइएको डिएसपी शर्माले जानकारी दिए ।
सोही स्थानबाट गत श्रावण ३१ गते तामाङ्गको श्रीमती माइली तामाङ्गसहित जुवा खेलिरहेको अवस्थामा १० लाख ५८ हजार नगद सहित १६ जना जुवाडेहरुलाई पक्राउ गरेको थियो ।