बार्सिलोना समूह विजेता बन्दै अन्तिम १६ मा

एजेन्सी, ९ मंसिर । बार्सिलोना समूह विजेता बन्दै अन्तिम १६ मा प्रवेश गरेको छ । गएराति भएको खेलमा बार्सिलोनाले सेल्टिकलाई २–० गोल अन्नरले पराजित गर्दै अन्तिम १६ मा प्रवेश गरेको हो ।
सेल्टिकको घरेलु मैदानमा भएको खेलमा बार्सिलोनाले २४ औं मिनेटमा मेस्सीको गोलबाट अग्रता लिएको थियो । दोस्रो हाफको ५५ औं मिनेटमा पाएको पेनाल्टीमा मेस्सीले नै गोल गरे । त्यसको केही मिनेट अघि सेल्टिकले गोल गर्ने राम्रो मौका पाएको थियो । पहिलो हाफको अन्त्यतिर बार्सिलोनाका लुइस स्वरेजको हेड गोल प्रयास सेल्टिकका गोलरक्षकले रोके । त्यस्तै मौसा डेम्बेलेको हेड बार्सिलोनाका गोलरक्षकले रोके ।
जितसँगै बार्सिलोना ५ खेलबाट १२ अंकसहित समूह सीको शीर्ष स्थानमा छ । अर्को खेलमा म्यानचेष्टर सिटीले बोरुसिया मानचाङलेबाखसँग १–१ को बराबरी खेलेको छ र ८ अंकका साथ अन्तिम १६ मा स्थान बनाएको छ । सेल्टिक र बोरुसिया मानचाङलेबाख भने समूह चरणबाटै बाहिरिए ।