फेरि सर्‍यो सातौं राष्ट्रिय खेलकुद

काठमाडौं, ७ मंसिर । पूर्वाञ्चलमा हुने भनिएको सातौं बृहत् राष्ट्रिय खेलकुद प्रतियोगिता पुनः सरेको छ । पटकपटक स्थगित हुँदै आएको सातौं राष्ट्रिय खेकलुद प्रतियोगिता फेरी एक महिना सारिएको छ । राष्ट्रिय खेलकुद परिषद्को हिजो बसेको बोर्ड बैठकले सातौंको मिति पुस ८ देखि १५ गतेसम्मका लागि तोकेको हो । राष्ट्रिय खेलकुद प्रतियोगिता आयोजनाको मिति सारिएको यो चौथो पटक हो ।
दुई महिनाअघि मात्र सातौं राष्ट्रिय खेलकुद मंसीर ८ देखि १५ गतेसम्म गरिने बताइएको थियो । सुदूरपश्चिममा भएको  छैटौं  राष्ट्रिय खेलकुद प्रतियोगिता आयोजना भएको पाँच वर्ष बितिसक्दा पनि सातौं राष्ट्रिय खेलकुदको मिति भने सरेको सरै छ ।
राखेपले राष्ट्रिय खेलकुद प्रतियोगिताका लागि क्षत्रीय छनोट मंसीर २० देखि २८ गतेसम्म सञ्चालन गर्ने निर्णय गरेको छ । यसअघि राखेपअन्तर्गत सातौं तयारी समितिले कात्तिक २३ देखि मंसिर ३ गतेसम्म सञ्चालन हुने भनिएको क्षेत्रीय छनोट प्रतियोगिता प्राविधिक कारणले स्थगित गरेको थियो ।
यसअघि २०७० सालमा हुने भनिएको सातौं राष्ट्रिय खेलकुद संविधानसभाको निर्वाचनका कारण सरेको थियो । गत असोजमा मात्र सातौं राष्ट्रिय खेलकुदका लागि राखेपका अध्यक्ष एवं युवा तथा खेलकुदमन्त्री दलजीत श्रीपालीको नेतृत्वमा ‘फास्ट ट्र्याक टास्क फोर्स’ गठन गरिएको थियो ।
सातौंकै लागि त्यसअघि पनि खेलकुदमन्त्रीकै नेतृत्वमा मूल आयोजक समिति गठन गरिएको थियो । प्रत्येक दुई वर्षमा हुनुपर्ने राष्ट्रिय खेलकुद प्रतियोगिताको छैटौं संस्करण २०६८ सालमा सुदूरपश्चिमाञ्चलमा सम्पन्न भएको थियो ।
बैठकमा खेलकुद मन्त्रालयका सचिव महेशकुमार दाहाल, सहसचिव चूडामणि पौडेल, बोर्ड सदस्यहरू, क्षेत्रीय खेलकुद विकास समितिका अध्यक्षलगायतको उपस्थिति थियो ।