विश्वकप छनौटमा स्पेन र इटली विजयी

एजेन्सी, २८ कार्तिक । विश्वकप २०१८ को छनौट अन्तर्गत गएराति भएका खेलमा स्पेन र इटली विजयी भएका छन् ।
समूह जी अन्तर्गत गएराति भएको खेलमा इटालीले लिचेस्टाइनलाई चार शुन्यले हराएको हो ।
इटालीका लागि आन्द्रेया बेलोटीले दुई तथा किरो इमोबिली र एन्टोनियो क्यनड्रेवाले एक एक गोल गरे । जितपछि ४ खेलबाट इटालीको १० अंक भएको छ ।
अर्को खेलमा स्पेनले मेसेडोनियालाई चार शुन्यले हराएको छ । स्पेनलाई जिताउन माचिन पेरेज, भिटोलो नाचो मोन्रियल र अरिट्ज अडुरिजले एक एक गोल गरे । मेसेडोनियाका डार्की वेलकोवस्कीले आत्मघाती गोल गरे । जितपछि चार खेलबाट १० अंक जोडेको स्पेन समूह जीको शीर्ष स्थानमा छ ।
समान १० अंक नै भएपनि इटाली गोल अन्तरका आधारमा दोस्रो स्थानमा छ ।
समूह जी अन्तर्गत नै भएको खेलमा इजरायलले अल्वानियालाई तीन शुन्यले हराएको छ । राति नै भएका अरु खेलमा क्रोएसियाले आइसल्याण्ड तथा टर्कीले कोसोभोलाई समान दुई शुन्य र युक्रेनले फिनल्याण्डलाई एक शुन्यले हराएका छन् । समूह डि को वेल्सले सर्बियासँग एक एकको बराबरी गरेको छ ।