काठमाडौं । चालु आर्थिक वर्षको साउन, भदौ, असोज र कात्तिक महिनामा मुलुकको समग्र आयात १८ प्रतिशतले घटेको छ । भन्सार विभागले सार्वजनिक गरेको तथ्यांकअनुसार चालु आर्थिक वर्षको पहिलो चार महिनामा कुल ५ खर्ब ३२ अर्ब रुपैयाँको वस्तु आयात भएको छ । गत वर्षको यसै अवधिमा कुल ६ खर्ब ५० अर्ब रुपैयाँको वस्तु आयात भएको थियो ।
आयात घट्दा समग्र व्यापार घाटामा केही राहत भएको छ । सो अवधिमा व्यापार घाटा १५.८८ प्रतिशतले घटेको छ । यस आवको पहिलो चार महिनामा मुलुकको व्यापार घाटा ४ खर्ब ७७ अर्ब रुपैयाँ बराबर छ । जवकि गत वर्षको यसै अवधिमा ५ खर्ब ६८ अर्ब थियो ।
सरकारले केही वस्तु आयातमा लगाएको प्रतिबन्धका कारण पनि आयात घट्न गएको हो । वैशाखदेखि नै सरकारले चार पांग्रे सवारीसाधन, मदिरा, १५० सीसीमाथिका मोटरसाइकल र महँगा मोबाइलको आयातमा प्रतिबन्ध गरेको छ । जुन प्रतिबन्ध मंसिर मसान्तसम्म तोकिएको छ । आयातमा लगाएको प्रतिबन्धका कारण घटेको व्यापार घाटालाई लिएर हाैसिनुपर्ने अवस्था भने नरहेकाे जानकार बताउँछन् ।
मुलुकको निर्यात पनि ३३.३ प्रतिशतले घटेको छ । विभागका अनुसार चालु आर्थिक वर्षको पहिलो ४ महिनामा ५४ अर्ब ७७ करोड रुपैयााको वस्तु निर्यात भएको छ । गत वर्षको यसै अवधिमा ८२ अर्ब १२ करोडको वस्तु निर्यात भएको थियो ।
प्रकाशित मितिः २०७९ मंसिर ०७ बिहिबार
Comments