काठमाडौं, ६ बैशाख । राष्ट्रिय योजना आयोग उपाध्यक्षविहीन भएको झण्डै दुई महिना भएको छ । योजना आयोग नेपाल सरकारको राष्ट्रिय योजना तर्जुमा गर्ने केन्द्रीयस्तरको कार्यलय पनि हो ।
यही कार्यालयमा अहिले सरकारको आर्थिक सल्लाहकारका रूपमा हेरिँदै आएको उपाध्यक्ष पद खाली छ । २०७४ साउनमा शेरबहादुर देउवा सरकारले नियुक्त गरेका उपाध्यक्ष डा। स्वर्णिम वाग्लेले फागुनमा राजीनामा दिएसँगै यो पद खाली भएको हो ।
देशको दीर्घकालीन विकासका लागि नेपाल सरकारका लागि योजना बनाउने काममा सामेल हुने पद दुई महिनासम्म रिक्त हँुदा दीर्घकालीन योजनाका काम प्रभावित भएको छ । यद्यपि, आयोगको पुनर्संरचना गरिएकाले बजेटमा उपाध्यक्षको भूमिकालाई ठूलै महत्व भने दिइएको छैन ।
विद्यमान संरचनाअनुसार योजना निर्माणको काम गरिरहेको राष्ट्रिय योजना आयोगको पुनर्संरचना भएसँगै उसले गर्दै आएको काम अर्थ मन्त्रालयमार्फत हुने गरी मन्त्रालयका स्वरूपमा परिवर्तन गरिँदैछ ।
योजना आयोगको आदेश २०७४ पारित भइसकेकाले योजना आयोगको काम नीति निर्माणमा सीमित भएको हो ।तथापि उपाध्यक्षको अनुपस्थितिमा गरिएका निर्णयलाई परिपक्व भने अझै मानिँदैन । साथै निमित्तको जिम्मेवारी सम्हालेकाले पनि सहासिला निर्णय गर्न डराउँछन् भन्ने बुझाइ छ ।
सरकार परिवर्तन भएसँगै नयाँ प्रधानमन्त्रीले पार्टी र आफू निकटका व्यक्तिलाई आयोगको उपाध्यक्षमा नियुक्त गर्ने परम्परा छ । आयोगको अध्यक्ष भने प्रधानमन्त्री नै हुने व्यवस्था छ । माओवादी अध्यक्ष तथा बामगठबन्धनका एक नेता प्रचण्डले योजना आयोग गठन गर्न प्रधानमन्त्री केपी ओलीलाई पटक–पटक सुझाव दिएका छन् ।
Comments