काठमाडौं । ईडिन्सन काभानी र थिएगो सिल्भाले फ्रान्सेली क्लब पेरिस सेन्ट जर्मेन पीएसजी छाड्ने भएका छन् । पीएसजीका कीर्तिमानी गोलकर्ता काभानी र कप्तान थिएगो सिल्भाले यस सिजनको अन्त्यसंगै पेरिस क्लब छाड्ने पक्का भएको हो ।
क्लबका निर्देशक लियोनार्दोले ३३ बर्षिया फरवार्ड काभानी र ३५ बर्षिया कप्तान सिल्भाले फ्रि एजेन्टको रुपमा क्लब छाड्न लागेको पुष्टि गरेका छन् । दुवै खेलाडीको क्लबसंगको सम्झौता यसै सिजन सकिदै थियो ।
पेरिस क्लबले दुवै खेलाडीले अगष्टमा हुने च्याम्पियन्स लिगमा खेल्ने आशा गरेको छ । च्याम्पियन्स लिगको क्वाटरफाईनल पुग्ने चार टिम मध्य पीएसजी समेत एक हो ।
‘यो साँचो हो । हामी दुवै यात्राको अन्तिम बिन्दुसम्म पुग्दैछौ ।’ फ्रान्सेली पत्रिकालाई दिएको अन्तरवार्तामा लियोनार्दोले भनेका छन्, ‘हाम्रो सोच अगष्टको अन्तिमसम्म राख्ने रहेको छ । जसले गर्दा उनीहरु च्याम्पियन्स लिग खेल्न सकुन ।’
पीएसजीका सहकर्मी आन्द्रे हेरेराले काभानी ला लिगा जान चाहेको बताईरहेको समय क्लबले यस्तो घोषणा गरेको हो । काभानी ला लिगा क्लब एट्लेटिको मड्रिडसंग जोडिएका छन् । पीएसजीसंग सम्झौता सकिनु अघिनै काभानी एट्लेटिकोसंग सम्झौता गर्न चाहेका थिए ।
क्लबले साढे ८ मिलियन पाउण्डको प्रस्तावलाई यसअघि अस्विकार गरेको थियो । तर हेरेराले भने काभानी र क्लब सम्झौताको नजिक रहेको बताएका छन् । काभानीले ७ बर्ष फ्रान्सेली क्लब पीएसजीमा बिताएका थिए ।
‘मलाई थाहा छ, काभानी स्पेनमा खेल्न चाहन्छन् ।’ हेरेराले एक अन्तरवार्तामा भनेका छन् । ‘उनले देश र लिगलाई मन पराउँछन् । उनले मसंग धेरै सोधेका पनि छन् ।’ हेरेराले भने । पछिल्लो हप्ता मौरो ईकार्डीले स्थायी रुपमा पीएसजीसंग सम्झौता गरेपछि ३३ बर्षिया फरवार्डको फ्रान्स बसाई अनिश्चित बनेको थियो ।
काभानी गत जनवरीमा चेल्सीसंग समेत जोडिएका थिए । उनी ईन्टर मिलानसंग समेत सम्पर्कमा छन् । ईकार्डीलाई पीएसजी बेचेको ईन्टरले लौटेरो मार्टिनेजलाई बार्सिलोना पठाएको खण्डमा काभानीलाई अनुबन्ध गर्न सक्नेछ ।
चोटका कारण काभानीले यस सिजन पीएसजीबाट मात्र १४ लिग खेल मात्र खेल्न सके । उनी ८ पटक बैकल्पिक खेलाडीको रुपमा मैदान छिरेका थिए । उनले ४ गोल र २ गोलको अवसर समेत सिर्जना गरेका थिए । एजेन्सी
प्रकाशित मितिः २०७७ जेठ ३२ आइतबार
Comments