काठमाडौं। कतार एयरवेज सहिद स्मारक ए डिभिजन लिगमा आज (आईतबार) एक खेल हुँदैछ । अखिल नेपाल फुटबल संघ एन्फाले आईतबार हिमालयन शेर्पा र विभागीय टिम शसस्त्र प्रहरी बल एपीएफबीचको खेल निर्धारण गरेको छ ।
दशरथ रंगशालामा हुने खेल दिउँसो ३ बजे सुरु हुनेछ । लिग तालिकामा हिमायन शेर्पाले पहिलो खेलबाट १ अंक रहेको छ । एपीएफले खाता खोल्न सकेको छैन । शेर्पाले विभागीय नेपाल पुलिस क्लबलाई बराबरीमा रोक्दै लिगमा सुरुवात गरेको थियो ।
स्टार र अनुभवी खेलाडी बिना नै बलियो पुलिसलाई रोक्दै शेर्पा क्लबले लिगमा महत्वपुर्ण एक अंक जोडेको थियो ।
‘बलियो पुलिसलाई रोक्नुनै हाम्रो लागि जित सरह हो ।’ खेलपछि शेर्पाका प्रशिक्षक सञ्जिब बुढाथोकीले भनेका थिए ।
उनले लिगको डेब्यु खेलमै अंक जोड्न सफल भएका थिए । फेरी एक पटक हिमायन शेर्पा क्लब लिगमा अंक नगुमाउने लक्ष्य सहित एपीएफविरुद्व मैदान उत्रदैछ ।
पहिलो पटक ए डिभिजन लिगमा क्लबको नेतृत्व गरिरहेका सञ्जिव लिगको दोस्रो खेलमा समेत कम्तिमा पनि सोही नतिजा दोहर्याउन चाहन्छन् । प्रत्येक दिन टिम सेट हुँदै जाने भन्दै उनी बलियो एपीएफविरुद्ध अंक खोस्ने दाउमा छन् ।
पहिलो खेलमा विदेशी खेलाडी बिना मैदान उत्रिएको शेर्पाले लिगको दोस्रो खेलमा पनि विदेशी खेलाडी खेलाउन पाउने सम्भावना कम छ । भिषा प्रक्रिया पुरा नहुँदा प्रशिक्षक संञ्जिब समस्यामा छन् । उनी सेट टिममा एपीएफविरुद्ध एक मात्रै विदेशी खेलाडी भएपनि खेलाउने तयारीमा छन् ।
पहिलो चरणमा स्पष्ट तीन अंक हासिल गर्न नसकेका दुबै क्लब दोस्रो चरणमा भने स्पष्ट तीन अंक चाहन्छन् । पहिलो चरणमा शेर्पा क्लबले पुलिससँग गोलरहित बराबरी खेलेको थियो । एपीएफ भने पहिलो खेलमै तीन अंक गुमाउन पुग्यो । एपीएफ गत सिजनको च्याम्पियन मनाङसँग २–० गोल अन्तरले पराजित भएको थियो ।
गत सिजन दुई टिमबीच भएको भिडन्त गोल रहित बराबरीमा टुंगिएको थियो । जुन खेलमा एपीएफ गोलको नजिक पुगेर पनि असफल बनेको थियो । पहिलो खेलमै तीन अंक गुमाएका एपीएफका प्रशिक्षक राजेन्द्र तामाङ दोस्रो खेलमा तीन अंक हासिल गर्न चाहन्छन् ।
‘पहिलो खेलमै हार ब्यहोरेका कारण दोस्रो खेल निकै महत्वपुर्ण छ । त्यसैले तीन अंकको लागि खेल्छौं । तयार पनि छन् ।’ उनी भन्छन् । पहिलो खेलमा राष्ट्रिय टिमका खेलाडी बिना खेलेको मनाङलाई दबावमा राखेपनि एपीएफ गोल गर्न चुकेको थियो ।
खेलमा बल पोजिसन र पोष्ट आक्रमण मनाङको तुलनामा धेरै देखिएपनि एपीएफको स्कोरिङमा समस्या देखिएको थियो । त्यसैले सो गल्ती शेर्पा क्लबविरुद्व नदोहर्याउने पक्षमा एपीएफ छ । प्रशिक्षक तामाङ दोस्रो खेल निकै महत्वपुर्ण रहेको कारण टिमले निकै मेहनत गर्नुपर्ने बताउँछन् ।
प्रकाशित मितिः २०७६ पौष ६ आइतबार
Comments