काठमाडौं । ‘छ्या यस्तो अवस्थामा त के खेल्नु र बेईजत मात्रै गर्न’। शुक्रबार सातदोबाटोस्थित राखेपको सुटिङ हल छिर्दै गर्दा श्रेया केसी फतफताउँदै थिईन् । तेह्रो साग अन्तर्गत सुटिङका खेल धमाधम सञ्चालन भईरहेका छन् ।
शुक्रबार सुटिङ हल पुग्दा अवस्था दयनिय देखिन्थ्यो ।चीन सरकारको सहयोगमा निर्माण गरिएको सुटिङ रेन्ज एसियाकै उत्कृष्ट मानिएको छ । तर आवश्यक सामाग्रीको जोहो गर्न नसक्दा साग खेलकुदमा सुटिङले राष्ट्रिय बेईज्जत मात्र गरेको छ ।
खेलाडीहरु प्रतिद्वन्दीसंग गोली मागेर प्रतिस्पर्धा गर्न बाध्य छन् । शुक्रबार सुटिङ हल छिर्दै गर्दा श्रेयामा बेचैनी देखिन्थ्यो । अनुहार मलिनो थियो । आँशु झारिरहेकी थिईन् ।
स्कोर बोर्डमा १० मिटर एयर पेस्तोल चलिरहेको थियो । श्रेया प्रतिस्पर्धामा थिईन् । प्रतिस्पर्धी भारतीय, पाकिस्तानी र बंगलादेशी खेलाडीमात्र उनी भन्दामाथि थिए । श्रेया चौथो स्थानमा थिईन् ।
पेस्तोलले धोका दिएपछि श्रेया रुनु न हाँस्नु बनेकी रहेछिन् । १ घण्टासम्म चल्ने १० मिटर एयर पेस्तोलमा एक खेलाडीले ६० पटकसम्म सुट गर्न पाउँछन । जसमा श्रेयाले १४ गोली प्रहार गर्न बाँकी थियो । उनले ४६ गोली जसोतसो प्रहार गरिन् । त्यसपछि पेस्तोल नचल्ने भयो ।
उनी एरिनामा बसेर आखाँबाट आँसु झार्न थालिन् । श्रेयालाई १४ गोली हान्न १८ मिनेटको समय थियो । एकपछि अर्को गर्दै समय घट्दै थियोे । श्रेय विवस थिईन्, लाचार देखिन्थिन् । उनी रुन बाहेक केहि गर्न सकिरहेकी थिईनन् ।
‘विदेशीका अगाडी बेईजत नगरौं । बरु खेल्ननै छाडौ ।’ एक प्रतिनिधि भन्दै थिए ।
फाईनल चरणको नजिक पुगेकी श्रेया खेल छाड्ने मुडमा थिईनन् । माल्दिभ्सका एक प्रतिनिधि अगाडी बढे । रिङमा उभिएर श्रेयालाई हेरिरहेकी एक नेपाली खेलाडीलाई सोधे, खेल किन रोकिएको, के भयो नेपाललाई ?
उनी एकछिन चुपचाप बसिन । उनी निशब्द थिईन् । राज्यको अर्बौ रुपैयाँ खर्चिएर खेल महोत्सव चलिरहँदा सुटिङका खेलाडीसंग खेल्ने सामाग्रीनै छैन । माल्दिभ्सका प्रतिनिधिले पुन सोही प्रश्न दोह¥याए ।
उनले पेस्तोलले काम नगरेको बताईन् ।समय सकियो । विदेशी हेड जुरी कैशारुल इस्लामले सुरुमा नेपालको समय नथपिने बताए ।
लगत्तै उनले चीनियाँ प्रतिनिधिसँग कुरा गरे । अनि उनले श्रेयालाई ३ मिनेट परिक्षणकाल र ७ मिनेट बाँकी १४ गोली सकाउन समय दिए ।
जुरीले समय त दिए । तर पेस्तोल छैन । फेरि पेस्तोल मगाउन पर्ने भयो ।
सहभागीले पेस्तोल त दिए तर जुरीले त्यस पेस्तोलको कोड नम्बर र प्रतिनिधि बोलाए ।
पेस्तोलका प्रतिनिधि त्यहाँ थिएनन् ।
त्यसपछि नेपालकै २५ मिटर ¥यापिड फायर पेस्तोल स्पर्धाका विपेश खड्काले आफ्नो पेस्तोलको सम्पुर्ण विवरण जुरीसंग बुझाए ।
अनि श्रेयाको समय सुरु भयो ।
अब श्रेयाले ७ मिनेटमा १४ गोली प्रहार गर्नुपर्ने भयो । त्योपनि २५ मिटरमा खेल्ने पेस्तोलले १० मिटरमा निशाना लगाउनुपर्ने भयो ।
उनले हतार हतारमा प्रहार गरिन् ।तर सुरुको गति र जोश उनमा देखिएन । उनले अंक जोड्न सकिनन् । पदक नजिकै पुगेकी श्रेया अन्तिम समयमा पेस्तोलले धोका दिएपछि पहिलो चरणबाटै बाहिरिन् ।
चौथो स्थानकी श्रेया अन्तिममा ५ सय ३३ अंक सहित सातौं स्थानमा खेल टुङ्गाईन् । देशलाई सुटिङतर्फ पहिलो पदक दिलाउने उनको सपना पुरा भएन ।
खेल सकिएपछि श्रेया प्रतिक्रिया दिन डराईन् । सुटिङबारे खराब समाचार बाहिरिएसंगै खेलाडीलाई बाहिर नबोल्न उर्दी जारी गरिएको रहेछ ।
‘कृपया म मिडियासँग बोल्दिन । मलाई गाह्रो हुन्छ ।’ श्रेयाले भनिन् ।
प्रशिक्षकसँग बोल्न खोज्दा समेत सोही डर देखिन्थ्यो । उनी समेत बोल्न मानेनन् ।
फाइनल पुग्ने सम्भावना हुँदा हुँदै समूह चरणबाट बाहिरिएपछि संघका पदाधिकारी समेत रिसले चुर देखिन्थे ।
एक पदाधिकारीले भने, ‘पहिला त धोका भएकै थियो । आज पनि त्यस्तै भयो । अब यो पेस्तोल सागपछि फ्याल्दिन्छु ।’
प्रकाशित मितिः २०७६ मंसिर २० शुक्रबार
Comments