काठमाडौं ८ साउन । इंग्ल्यान्डको लर्ड्समा हुने त्रिकोणात्मक टी–२० सिरिजका लागि इंग्ल्यान्डमा रहेको नेपाली क्रिकेट टोलीले दोस्रो अभ्यास खेलमा पराजित भएको छ । इङ्ल्याण्डको स्थानीय क्लब सेन्ट क्रससंग भएको दोस्रो अभ्यास खेलमा नेपाली टोली १९ रनले पराजित भएको हो ।
१ सय ६९ रनको लक्ष्य पछ्याएको नेपालले ८ विकेटको क्षतिमा १ सय ४९ रन मात्र बनाउन सक्यो । नियमित कप्तान पारस खड्का बिना मैदान उत्रिएको नेपाली टिमको नेतृत्व ज्ञानेन्द्र मल्लले गरेका थिए । अनिल कुमार शाहले ५६ रन, आरिफ शेखले ३४ रन र सुवास खकुरेलले १० रन बनाए भने सोमपाल कामी १६ रनमा नकआउट रहे । बनाए । शरद भेषवाकरले रनको खाता खोल्न सकेनन् । क्रसका फेलिक्स अर्गनले ३ विकेट लिए । ह्यारीले २ तथा असर हर्टले १ विकेट लिए ।
यसअघि टस जितेर पहिले ब्याटिङ गरेको सेन्ट क्रसले निर्धारित ओभरमा ६ विकेट गुमाएर १ सय ६८ रन बनाएको थियो । जिम्मी एडम्सको ७२ रनको मदतले घरेलु टोलीले सो स्कोर खडा गरेको हो । फेलिक्स अर्गनले ३९ रन र टोम स्क्रिभिनले २३ रन बनाए । ह्यारी ११ रनमा तथा माट फ्लोयड ७ रनमा आउट भए । टोम फोयले र ब्राड शुन्य रनमा आउट भए । नेपालका बसन्त रेग्मी र सोमपाल कामीले समान २÷२ विकेट लिए । सन्दिप लामिछानेले एक विकेट लिए ।
यसअघि शनिबार भएको पहिलो अभ्यास खेलमा नेपालले ह्यामसायर होग्सलाई २४३ रनले हराएको थियो । नेपालको जितमा कप्तान पारस खड्काले १६१ रनको शतकीय पारी खेलेका थिए । यस्तै नेपालले जुलाई २५ मा इष्ट लन्डन ११ विरुद्ध ५० ओभरको खेल खेल्नेछ । त्यसपछि नेपालले अन्तिम अभ्यास खेलमा इष्ट लन्डन शार्कसंग जुलाई २६ मा टी–ट्वान्टी खेल खेल्नेछ । त्यसपछि नेपालले जुलाई २९ तारिखमा लर्डसमा हुने नेपाल, नेदरल्याण्ड्स र मेरिलेबन क्रिकेट क्लब एमसीसीसँगको त्रिकोणात्मक ट्वान्टी ट्वान्टी सिरिज खेल्नेछ ।
Comments