भक्तपुर । दशैंको रौनकता माझ भक्तपुरमा जुवाको खाल र कौडाको खालबाट प्रहरीको राम्रै आम्दानीको बाटो बनेको छ । प्रहरीले जुवा तास र कौडामा कडाई गरेको जनाएता पनि थिमिमा भने केही सादा पोशाकका प्रहरीकै लगानी र संरक्षणमा कौडाको खाल जम्ने गरेको स्रोत बताउँछ ।
खेलाडीहरुलाई समेत खेल स्थानका बारे जानकारी नदिई एका एक लगिनुका साथै स्थानको चयन समेत सादा पोशाककै प्रहरीको सेटिङमा हुने एक जुवाडे नाम उल्लेख नगरिदिने शर्तमा भक्तपुर न्यूजलाई बताउँछन् । उनी भन्छन् जुवाडेसँग खेल्दै गर्दा रकम सकियमा समेत खेल स्थानमा बसेका सादा पोशाकका प्रहरीले नै मिटर ब्याज सिस्टमा रकम उपलब्ध गराउने गरेका छन् । मिटर ब्याज दिएपछि केही समय वा भोली पल्ट रकम उपलब्ध गराउनु पर्ने तर त्यसबापत १० देखी २० प्रतिशत प्रतिदिन थप ब्याज तिर्नु पर्ने समेत उनी बताउँछन् ।
पाँच देखि १० जना युवाहरुले खेलाउने गरेको कौडा अखडाको संरक्षणमा प्रहरीले नै लगानी र हप्ता अशुली गरी खेलाउने गरेपछि बिगतमा खेलाउनेहरुको आम्दानीमा समेत घाटा भएको एक पूर्व कौडा खेलाउने युवा बताउँछन् । उनी भन्छन् सबै तह र तप्काको सेटिङ पश्चात मात्र कौडा खाल लगाउने गरेको र जुवाडेहरु भक्तपुरकै जग्गाका कारोवारी, केही भट्टा साहु, सरकारी कार्यालयका केही अधिकृतहरु र स्वएंम प्रहरीकै केही ब्यक्तिहरु समेत रहेको उनी बताउँछन् ।
प्रहरीको संरक्षणमा कौडा खाल जम्ने भएपछि जुवाडेहरु ढुक्कसाथ खेल्न पाउने भएकाले समेत हप्ता दिन कुनै झन्झट नहुने कौैैैैैडा खेलाउनेहरु बताउँछन् । एक जुवाडे भन्छन्, खेल स्थानका बारे जानकारी नदिने भएता पनि एक पटक त प्रहरी कार्यालय नजिकै राखिएको कन्टेनर भित्र समेत लाखौंको खाल जम्यो । अर्का जुवाडे त्यसमै थप्छन् एक रात त सादा पोशाकका प्रहरीको निवासमै खाल जम्यो । थिमि क्षेत्रका बिभिन्न स्थानमा मात्र नभएर जगाती प्रहरी बृत आसपासमा समेत लाखौं लाखको कौडाको खाल जम्ने गरेको एक जुवाडे दावीका साथ भन्छन् ।
अन्य समयमा भन्दा दशैको समयमा खाल ठूलो हुने भएकाले र सेटिङ मिलाउनेलाई समेत राम्रै लाखौं आम्दानी हुने भएकाले केही सादा पोशाकका प्रहरीको आकर्षण रहेको एक प्रहरी अधिकृत बताउँछन् । उनी भन्छन् सबैको सेटिङ नमिलेको भए कसरी जुवा र कौडाको खाल जम्न सक्छ उल्टो प्रति प्रश्न गर्छन् ।
Comments