काठमाडौं, २५ भदौ । सवारी साधनको लाइसेन्स निकाल्नका लागि केहीले निशुल्क प्रयोगात्मक परीक्षा (ट्रायल) दिन पाएका छन् भने केही चर्को शुल्कको मारमा पर्न थालेका छन् । यातायात व्यवस्था विभागसँगको सम्झौताअनुसार ट्रायल नदिइएको सम्वन्धमा परेको रिट निवेदनको सुनुवाई गर्दै सर्वोच्च अदालतले सुजुकीको पक्षमा फैसला गरेपछि विगत एक साता यता उसले ट्रायलको जिम्मेवारी लिन थालेको छ । त्यसअघि यातायात व्यवस्था विभागले सुजुकीलाई दिएको ट्रायलको जिम्मेवारीप्रति परेको रिट निवेदनमा अदालतले नै ‘स्टे अर्डर’ जारी गर्दै रोकेको थियो ।
अदालतले पुनः बाटो खोलेपछि यातायात कार्यालय एकान्तकुनाबाट फारम भर्नेहरुले सुजुकीमै चर्को शुल्क तिरेर ट्रायल दिनु परेको छ । सुजुकीमा गाडीको ट्रायल दिनेहरुले प्रतिव्यक्ति ४ सय ७ रुपैयाँ र मोटरसाइकलका लागि ट्रायल दिनेहरुले २ सय २६ रुपैयाँ शुल्क बुझाउनुपर्ने बताईएको छ ।
तर त्यही लाइसेन्सका लागि यातायात कार्यालय सुकेधारा, ठूलो भ¥र्याङ र भक्तपुरको जगातिबाट आवेदन दिनेहरुले भने निशुल्क रुपमा ट्रायल दिन पाएका छन् । ट्रायलको जिम्मेवारी पाएको अर्को भेइकल सलुसन्सलाई यातायात व्यवस्था विभागले निशुल्क गर्न आग्रह गरेसँगै उसले विगत तीन सातादेखि ट्रायल निशुल्क गर्दै आएको छ ।
ट्रायलका लागि लिइँदै आएको शुल्कको विपक्षमा परेको रिटको सुनुवाई गर्दै सर्वोच्च अदालतले कुनै शुल्क नलिन सरकारका नाममा आदेश दिएको थियो । सो आदेशपछि विभागले तत्काललाई शुल्क नलिन भेइकल सलुसन्सलाई आग्रह गरेबमोजिम उसले अहिले निशुल्क गरेको सलुसन्सले जानकारी दिएको छ ।
पछिबाट अदालतले सुजुकीलाई बाटो खोलिदिएका कारण केही सर्वसाधारण चर्को शुल्कमा परेको यातायात व्यवस्था विभागका महानिर्देशक रुपनारायण भट्टराईले बताएका छन् । सुजुकी ड्राइभिङ स्कुलसँग विभागले गरेको सुरुको सम्झौताअनुसार नै उसले हाल शुल्क लिँदै आएको छ । जबकि भेइकल सलुसन्सले आफ्नो सम्झौताअनुसारको शुल्क समेत विभागको आग्रहपछि हटाएको छ। सुजुकीको शुल्कका सम्वन्धमा विभागले कुनै आग्रह समेत गरेको छैन ।
जसले गर्दा अदालतले ट्रायलका लागि कुनै शुल्क नलिनु भनेर दिएको आदेश कार्यान्वयन हुनुको साटो सुजुकीका पक्षमा आएको उसकै अर्को फैसलाबाट केही सर्वसाधारणले भने चर्को शुल्कको मारमा परेको गुनासो गरेका छन् ।
लाइसेन्स ट्रायल : कतै निशुल्क, कतै चर्को शुल्क असुली
0
Share.
Comments