कालीकोटमा ट्रयाक्टर दुर्घटना हुँदा चार जनाको मृत्यु

सुर्खेत। कालीकोटमा ट्रयाक्टर दुर्घटना चार जनाको मृत्यु भएको छ। पलाँता गाउँपालिका–९ थिर्पुबाट पलाँता–४ छलतर्फ खाद्यान्न, खुद्रा सामान लिएर जाँदै गरेको नम्बर नखुलेको ट्र्याक्टर पलाँता–२ बुडाडाँडा नजिक गएराति दुर्घटनामा परेको हो।

दुर्घटना मृत्युहुनेमा ट्र्याक्टर चालक मुगु खत्याड गाउँपालिका–५ कवाका २५ वर्षीय चन्द्र प्रकाश रोकाय, कालीकोट पलाँता गाउँपालिका–४ का २१ वर्षीय रवीन्द्र विक, सोही स्थानका ३२ वर्षीया सदु बुढा र पलाँता–५ सल्लीकोटकी २५/२६ वर्षीय अम्बा शाही छन्। उनीहरुको घटनास्थलमै मृत्यु भएको जिल्ला प्रहरी कार्यालय कालिकोटका प्रमुख टेकबहादुर रावतले जानकारी दिए।

उनका अनुसार दुर्घटनाग्रस्त ट्र्याक्टर सडकभन्दा तल अप्ठेरो भिरमा अड्किएको छ। शवहरु भने सडकभन्दा करिब २०० मिटर तल भेटिएको थियो।