जर्मनी इटालीको मैदानमा सन् १९८६ पछि पहिलो पटक विजयी

काठमाडौं। नेसन्स लिग क्वार्टरफाइनलको पहिलो लेगमा जर्मनीका कप्तान जोसुआ किमिचले दोस्रो हाफमा उत्कृष्ट प्रदर्शन गर्दै दुई गोलको अवसर सिर्जना गरे।

पहिलो हाफको चार मिनेटपछि उनले दायाँतर्फबाट दिएको क्रसलाई टिम क्लाइनडिएन्स्टले हेडरमार्फत बराबरी गोलमा परिणत गरे। ७६औं मिनेटमा किमिचले अर्को उत्कृष्ट क्रस प्रदान गरे, जुन लियोन गोरेट्स्काले गोल गर्दै जर्मनीलाई २–१ को जित दिलाए।

यो जित जर्मनीले इटालीको मैदानमा सन् १९८६ पछि पहिलो पटक हासिल गरेको हो। इटालीले खेलको पहिलो आक्रमणमै अग्रता लिएको थियो।

स्यान्ड्रो टोनाालीले जियाकोमो रसपाडोरीको डिफ्लेक्टेड क्रसमा जर्मनीका गोलकिपर ओलिभर बावमानलाई छक्काउँदै नवौं मिनेटमा गोल गरे। तर, उक्त अग्रता जोगाउन नसक्दा जर्मनी ३९ वर्षपछि इटालीको भूमीमा विजयी भएको हो।

जर्मनीका प्रशिक्षक जुलियन नागेल्समनले भने,‘पहिलो हाफ कठिन रह्यो, हामीले लय समात्न सकेनौं। ब्रेकपछि केहि समायोजन गर्यौं र प्रतिस्थापन खेलाडीहरूले राम्रो प्रदर्शन गरे।’

इटालीका प्रशिक्षक लुसियानो स्पालेत्तीले सिरी ‘ए’ का अग्रणी स्कोरर माटेओ रेतेगुइ अनुपस्थित हुँदा मोइसे कीनलाई अग्रपंक्तिमा स्थान दिएका थिए। तर, १५ गोल गरेका उनले कुनै जादु देखाउन सकेनन्।

यो समीकरणको विजेताले फाइनल चरणको खेल आयोजना गर्नेछ।