१९५ विद्यार्थीको उत्तरपुस्तिका हरायो

काठमाडौं, १९ असार । त्रिभुवन विश्वविद्यालयमा स्नातकोत्तर तहमा अध्ययन गर्ने १९५ विद्यार्थीको उत्तरपुस्तिका हराएको छ । त्रिविको आंगिक पब्लिक युथ क्याम्पसका एमबिएस प्रथम वर्षका विद्यार्थीको उत्तरपुस्तिका हराएको हो । पुसमा परीक्षा दिएका १९५ विद्यार्थीको उत्तरपुस्तिका नभेटिएपछि त्रिवि परीक्षा नियन्त्रण कार्यालयले अनुपस्थित भनेर अरु विद्यार्थीको नतिजा सार्वजनिक गरेको छ ।

उत्तरपुस्तिका नै नभेटिएपछि पनिकाले पुनः परीक्षाको वातावरण बनाउन खोजे पनि विद्यार्थीले भने त्यसको विरोध गरेका छन् ।
त्रिविका नवनियुक्त परीक्षा नियन्त्रक पुष्पराज जोशीले १९५ विद्यार्थीको उत्तरपुस्तिका नभेटिएको र कसको गल्ती हो भन्ने खोजतलास भइरहेको बताए । व्यवस्थापन संकायअन्तर्गतको स्नातक प्रथम वर्षको ५० पूर्णांकको एकाउन्टिङ विषयको उत्तरपुस्तिका नभेटिएको हो ।