नेपालको वर्तमान आर्थिक अवस्थाका विषयमा सिबिफिन र आईएमएफवीच छलफल

काठमाडौं । अन्तर्राष्ट्रिय मुद्रा कोष (आईएमएफ) बाट नेपालमा आएको मिसन टोलीले नेपालको वर्तमान आर्थिक परिदृष्य आर्थिक संकट आउनुको कारणबारे शुष्म अध्ययन गर्ने भएको छ । बुधबार बैंक तथा वित्तीय संस्था परिसंघ, नेपाल (सिबिफिन)को नेतृत्वसँग छलफल गर्दै आईएमएफका प्रमुख जार्को टुरुनेनले आर्थिक स्थितिको अध्ययन गरी प्रतिवेदन समेत तयार गर्ने बताए ।

आईएमएफको टोलि र सिबिफिनको नेतृत्वबीच नेपालको वर्तमान आर्थिक अवस्थाका विषयमा सघन छलफल गरेको छ । नेपालको भ्रमणमा रहेको उक्त मिसनका प्रमुख जार्को टुरुनेनले नेपालको अर्थतन्त्रको वर्तमान अवस्थाको समीक्षा र कोभिड–पछिको परिदृश्यहरुका विषयमा सरोकारवालाहरूसँग परामर्श गर्न आफुहरु नेपालमा आएको बताए ।

सो भेटका क्रममा सिबिफिनका प्रतिनिधिहरूले आयात, तरलताको समस्या र त्यसको असर, बैंक तथा वित्तीय संस्थाको मुनाफामा देखिएको संकुचन, पूँजीबजारमा आएको गिरावट, संस्थापक शेयरलाई सर्वसाधारण शेयरमा रुपान्तरण गर्न सकिने बाफियाको व्यवस्थाको कार्यान्वयनको अवस्था, निष्क्रिय कर्जामा भइरहेको वृद्धि, ब्याजदर, कर्जायोग्य पुँजीको अभावलगायतका विविध विषयमा आईएमएफका प्रतिनिधिसमक्ष जानकारी गराएका छन् ।

सिबिफिनको कार्यालय, सुन्धारामा सम्पन्न उक्त भेटघाट तथा छलफल अर्थपूर्ण भएको र आगामी दिनमा समेत आईएमएफले आर्थिक तथा बैंकिङ क्षेत्रका विविध विषयहरुमा सिबिफिनसँग गरिरहेको छलफल र सहकार्यलाई जारी राख्ने सन्देश दिएको छ ।

प्रकाशित मितिः २०७९ फागुन ११ बिहिबार