सिड्नीको तारोन्गा चिडियाखानाका पाँच सिंह खोरबाट निस्किएपछि…
१६ कार्तिक २०७९ १०:३८
काठमाडौं । सिड्नीको तारोन्गा चिडियाखानाका पाँच सिंह खोरबाट निस्किएको पाइएपछि चिडियाखानामा गएका आगन्तुकलाई सुरक्षित स्थानमा पुर्याएको छ । बुधबार बिहान साढे ६ बजे चिडियाखाना अधिकारीले एटो नामको एक भाले सिंह र चार डमरु(सिंहको बच्चा) उनीहरुलाई राखिने खोरबाट निस्केर डुलिरहेको पाएका थिए ।
त्यसलगतै ‘रोर एण्ड स्नोर’ नामक सुरक्षा कार्यक्रम सक्रिय गरिएको चिडियाखाना अधिकारीले बताएका छन् । त्यस अन्तरगत साइरन बजाएर त्यस समय चिडियाघरभित्र रहेका सम्पूर्ण आगन्तुक तथा कर्मचारीलाई सुरक्षित क्षेत्रमा सारिएको थियो ।
सिड्नी हार्बरको उत्तरी किनारमा रहेको चिडियाखानाका सबै कर्मचारी तथा पाहुना सुरक्षित स्थानमा नपुगेसम्म साइरन बजेको थियो ।
घटनाको समय चिडियाखानामै रहेका म्याग्नस पेरी र उनका परिवार त्यो समय टेन्ट क्षेत्रमा थिए । उनका अनुसार साइरन बजेसँगै उनका परिवार टेन्ट छाडेर सुरक्षित स्थानमा गएका थिए ।
चिडियाखाना प्रशासनले सिंहहरू निस्केको १० मिनेटमै आपतकालित सुरक्षा प्रतिक्रिया लागू गरिएको बताएको छ ।
‘यो गम्भीर घटना हो । सिंहहरू कसरी खोरबाट बाहिर निस्किए भनेर समीक्षा भइरहेको छ,’ चिडियाखानाका कार्यकारी निर्देशक साइमन डफीले स्थानीय मिडियालाई भने ।
प्रकाशित मितिः २०७९ कार्तिक १६ बुधबार
लोकप्रिय
