काठमाडौं, ९ चैत । राष्ट्रिय दल बन्न प्रत्यक्षतर्फ कम्तिमा एक सिट र समानुपातिकतर्फ कम्तिमा तीन प्रतिशत मत ल्याउनुपर्ने भएको छ । राष्ट्रिय दल बन्न चाहिने थ्रेसहोल्डको व्यवस्थासहितको विधेयक संसदको राज्य व्यवस्था समितिले पारित गरेको हो ।
आज बिहान बसेको उपसमिति बैठकले राष्ट्रिय दल हुनका लागि समानुपातिकतर्फ कम्तिमा ३ प्रतिशत मत र प्रत्यक्षतर्फ कम्तिमा एक सिट जित्नुपर्ने प्रावधान राख्ने निर्णय गरेपछि त्यसलाई समितिले अनुमोदन गरेको हो । यो विधेयकलाई आज नै संसदबाट पारित गर्ने तयारी छ । ठूला तीन दलका सांसदहरुले गरेको निर्णयप्रति साना दलका सांसदले बिरोध गरेका छन् ।कांग्रेस सांसद आनन्द प्रसाद ढुंगानाको संयोजकत्वमा रहेको उपसमितिमा थ्रेसहोल्डको निर्णयमा नेपाल मजदूर किसान पार्टीका सांसद प्रेम सुवाल र नेकपा मालेका अइन्द्रसुन्दर नेम्वाङले असहमति जनाएका हुन् ।
यस्तै, कुनै पनि दल फुटेर नयाँ राजनीतिक दल बन्नका लागि ४० प्रतिशत सांसद र केन्द्रिय कार्यसमितिका ४० प्रतिशत नेताको समर्थन लिनु पर्ने भएको छ । दल सम्बन्धी विधेयकमा पार्टीका ४० प्रतिशत सांसद र केन्द्रिय कार्यसमितिका ४० प्रतिशत नेताको समर्थन नजुटेमा फुटेको दलले राजनीतिक दलको मान्यता नपाउने व्यवस्था गरिएको एमाले नेता तथा राज्य व्यवस्था समितिका सदस्य गंगालाल तुलाधरले जानकारी दिए । यसअघि भने ४० प्रतिशत सांसदको समर्थन जुटाए पुग्ने थियो ।
यस्तै विधेयकले दुई वा दुई भन्दा बढी दलले साझा चुनाव चिन्ह लिएर चुनाव लड्न पाउने व्यवस्था पनि गरेको छ । यो व्यवस्था अनुसार चुनाव लडेका गठबन्धनमा रहेको कुनै दलले निस्कन्छु भने नपाउने र यदी निस्किएमा संसदमा प्रतिनिधित्व पनि गर्न नपाउने व्यवस्था गरिएको छ ।
राष्ट्रिय पार्टी बन्न समानुपातिकमा ३ प्रतिशत मत र प्रत्यक्षमा एक सिट ल्याउनैपर्ने
0
Share.
Comments